Loron 28 fulan abríl 2022 (GREC)- Sekretáriu Estadu Protesaun Sivíl, Joaquim José Gusmão dos Reis Martins akompaña husi Diretór Jerál Administrasaun no Finansas, Mariano de Araújo hala’o abertura ba workshop kona-ba Ezekusaun Orsamentu no Analizasaun Progresu Implementasaun atividades Primeiru Trimestrál, iha salaun enkontru DNSPPP-Matadouro-Dili.
Iha abertura Sekretariu Estadu Protesaun Sivíl kongratula servisu hotu ne’ebé mak hala’o husi kargus diresaun no xefia sira iha Ministériu Intériór ba ezekusaun orsamentu primeiru trimestre lao ho di’ak tebes maské hasoru difikuldades oin-oin.
“Ita haree katak tempu ne’e lao lalais tebes saida mak sai pasajen implementasaun iha Ministériu Interior no presija aselera ho lalais maské hasoru dezafiu boot liután husi servisu diresaun nasionál sira ba to’o iha faze preparasaun ida ne’ebé mak di’ak liga ba projetu konstrusaun infraestruturas tenkeser iha pontu fokál ida hodi akompaña prosesu hotu nune’e bele lao lalais, karik iha fallansu ruma ajusta ho lalais no fasíl hodi prosesa ho di’ak liután”.
Governante nee husu ba kargus diresaun no xefia sira tenki akompaña pontu fokál sira hodi ativu liután no halo cross chek ba servisu hotu ne’ebé mak iha ligasaun ho konstrusaun infraestrutras ba edifisiu husi diresaun tutela sira hodi bele alkansa objetivu servisu tanba Ministériu Interior sai hanesan ministériu xafe ne’ebé responsabiliza ba seguransa nasionál nasaun nian no labele husik hela konfiansa ne’ebé fó mai iha Ministériu liga ba programa orsamentu 2022 ne’ebé aprovadu husi Parlamentu Nasionál hodi monu leet de’it maibé presija ezekuta ho responsabilidade tuir tempu ne’ebé determinadu ho efetivu.
Membru Governu ne’e fó korajen ba kargu diresaun no xefia sira atu bele fó konsentrasaun ba iha ezekusaun orsamentu bazeia ba programa atividades tuir progresu implementasaun iha primeiru trimestre no kontinua aselera ba trimestre tuir mai.
Bazeia ba programas no alokasaun orsamentu ba primeiru trimestre husi fulan janeiru até ohin dia 28 abríl Ministériu Interior atinji ona 14,70 % ezekusaun oramentu. Tranferénsia Públikas 50%, Beins no Servisu 8,96%, saláriu Vensimentu 20, 15%, Kapitál Dezenvolvimentu 6,38%, Kapitál Menór 21,56%.
Workshop ne’e partisipa husi Kargus Diresaun no Xefia sira, pontu fokál Finansas, Xefe Gabinete, asesór nasionál inklui Xefe Administrasaun no Finansas PNTL ho durasaun loron ida tomak. Programa atividade ne’e aprezenta husi Finansas PNTL ne’ebé aprezenta kona-ba ezekusaun orsamentu no tenderizasaun, Diretór Nasionál Administrasaun no Finansas Abel Abreu da Costa Belo aprezenta kona-ba ezekusaun orsamentu, Diretór Nasionál Aprovizionamentu, Patricio Moreira da Silva aprezenta kona-ba Prosesu Tenderizasaun no fundus infraestruturas, Diretór Gabinete Planeamentu Estratéjiku no Asesoria, Francisco Soares aprezenta kona-ba implementasaun atividade no atinjimentu metas ba primeiru trimestre. #ED