DILI, 07 Fevereiru 2023 – Autoridade Proteção Civil (APC) liuhusi Diresaun Nasionál ba Prevensaun Konflitu Komunitáriu (DNPKK) servisu hamutuk ho Gabinete Prezidénsia Repúblika através apoiu UN WOMEN realiza Diálogu ba Páz ho tema prinsipál “Papél Lideránsa Komunitária ba Prevensaun Konflitu iha Kampaña Eleisaun Parlamentar 2023 Hodi Asegura Feto no Labarik,” iha resintu Palásiu PR, Aitarak Laran, Dili.
Sua Exelénsia Prezidente Repúblika, Dr. José Ramos-Horta iha diálogu hateten papél lideránsa komunitária importante atu hametin dame no naun violénsia iha rai laran.
Xefe Estadu konsidera violénsia mosu mai hosi komunidade, kuandu komunidade laiha lideránsa diak. Kuandu lideránsa di’ak hanesan Xefe Suku, Xefe Aldeia, Padre no Intelektuál sira, tenki dinámiku atu bele evita violénsia iha bairru.
Prezidente rekoñese lideránsa komunitária iha kna’ar importante tebes atu mobiliza-an no mobiliza komunidade sira atu partisipa no halo prevensaun ba konflitu sira, ne’ebé akontese iha komunidade.
Ikus liu, Premiadu Nóvel da Páz ninia mensajen husu ba entidade estadu, líder komunitária, líder árte marsiál no árte rituál, líder Parpol atu kria kondisaun dame no amigável hodi bele infuénsia membru sira labele hamosu konflitu no violénsia, nune’e mundu internasionál bele hare’e nasaun TL sai sivilizadu teb-tebes iha prosesu demokrásia.
Iha fatin hanesan Prezidente APC, Superintendente PNTL, Ismael da Costa Babo, M.Sc informa asuntu prevensau konflitu komunitáriu sai parte importante ba APC nia objetivu. Tamba ne’e APC liuhusi DNPKK iha mediadór no mediadora ne’ebé ninia servisu iha área prevensaun no rezolusaun konflitu.
“Mediador sira nia papél importante no sempre servisu hamutuk ho lideránsa komunitária sira iha rezolusaun konflitu, liuliu halo mediasaun hodi redús konflitu iha komunidade sira nia leet,” dehan Prezidente APC ne´e.
Líder APC ne’e mós dehan iha tempu badak nia laran protesaun sivil sei kria rede mediadór nasionál ida ne’ebé sei apoia estadu tomak hodi bele halo prevensaun ba konflitu komunitáriu no iha futuru sei kuandu iha orsamentu sei halo rekrutamentu ba mediadór no mediadora hodi koloka iha kada suku nune’e bele apoia halo mediasaun iha suku.
Partisipa iha diálogu Prezidente Autoridade Munisípiu Dili, Administradór Postu, Xefe Suku, Xefe Aldeia, estudante, lidér árte marsiál no árte rituál, líder parpol, inklui F-FDTL, PNTL, estrutura APC, funsionáriu sira husi instituisaun Estadu, UN WOMEN no g7+.