Dili – 08 Fevereiru 2023 – Autoridade Proteção Civil (APC) realiza konferénsia dahuluk komandu APC nian ba planu asaun protesaun sivil ba tinan ida nian nomós halo diskusaun ba dezafiu sira ne’ebé APC sira hasoru iha terenu.
Konferénsia APC ida ne’e ho objetivu tolu mak hanesan atu sosializa planu emerjénsia protesaun sivil (PENPS) nu’udar parte ida husi estratéjia nasionál ba jestaun risku dezastre ka DRM husi Autoridade protesaun sivil, atu kapasita komandu protesaun sivil kona-ba kooperasaun nasionál no internasionál liuhusi sistema umanitária internasionál no ikus liu atu identifika prátika no lisaun di’ak liu ne’ebé aprende ona kona-ba distribuisaun sasan la’os aihan.
Iha konferénsia ne’e Secretáriu Estadu Protesaun Sivil, Sua Excellensia Sr. Joaquim Gusmão dos Reis Martins iha nia intervensaun apresia tebes estrutura APC tomak ne’ebé esforsu-an hodi bele organiza enkontru ida ne’e hamutuk ho responsável iha Protesaun Sivil nasionál, rejionál no Munisípál
Ho esperánsa ida katak konferénsia APC ida ne’e sai konferénsia anual ba APC bainhira tama iha tinan foun, ho objetivu husi konferénsia ne’e sai hanesan forum ida ne’ebé bele fó hanoin, debátes nomós simu orientasaun no kestaun importante sira nune’e ita bele hatene saida mak APC sei halo iha tinan ida ne’e tuir planu ne’ebé diskute iha iha konferénsia.
Sekretariu Estadu ne´e mos apela ba estrutura APC nasionál, rejionál to’o munisípal hotu atu intende didi’ak ida-idak kna’ar importante sira hodi servi ita nia komunidade liuliu oinsa halo prevensaun no mitigasaun bainhira akontese dezastre.
“Timor-Leste hanesan nasaun ida ne’ebé nia zona Sensitivu teb-tebs ba liña dezastre sira hanesan udan boot, rai halai, be’e sa’e, anin boot, laloran bo’ot, rai nakdoko, rai halai, bailoron naruk no tinan-tinan Timor-Leste sempre sofre hela dezastre sira ne’e tanba ne’e ita presiza servisu makas,” dehan Sekretariu Estadu.
Membru governu ne’e mós hameno Komandu APC nasionál, rejionál no munisipál atu kuidadu no utiliza didi’ak veíkulu sira ne’ebé estadu fó hodi fasilita servisu APC tomak iha Timor-Leste.
Entertantu Prezidenti APC, Superintendente Ismael da Costa Babo, M.Sc espera liuhusi konferénsia dahuluk komandu nia bele haforsa liu planu servisu APC nian liuliu iha terenu.