Dili, 13 Fevereiru 2023 – Autoridade Protesaun Sivíl liu hosi Sentru Komandu Operasionál APC kontinua atualiza informasaun ba publiku kona-bá dadus dezastre ne´ebe akontese hosi 7 to´o 13 Fevereiru 2023.
Diretór ba Gabinete Relasaun Eksterna no Komunikasaun, Anacleto Caetano liu hosi konferensia imprensa informa hosi dadus semana ne´e, total uma komunidade hamutuk 18 mak hetan estragus kauza hosi anin bo´ot no insendiu.
“Iha munisípiu 8 ne’ebé hetan dezastre mak hanesan Munisípiu Ainaro anin sobu uma komunidade ida, Munisípiu Covalima udan bo’ot provoka be’e sa’e tama uma komunidade, Munisípiu Dili akontese ahi han uma komunidade ida no uma temporária ida, Munisípiu Ermera anin bo’ot hanehan labarik ida mate, Munisípiu Likisa anin bo’ot sobu uma komunidade hamutuk neen (6), Munisípiu Lautém anin bo’ot sobu uma komunidade ida (1), Munisípiu Manufahi sobu uma komunidade nian ida (1) no Munisípiu Vikeke ahi han uma komunidade ida (1),“ informa Anacleto Caetano, Segunda (13/2/2023), iha Salaun Konferensia APC, Caicoli, Dili.
Portavóz ne’e mós salienta ekipa APC iha nível munisípiu agora dadauk halo hela apoiu emerjénsia no kontinua halo verikasaun ba uma komunidade sira iha baze tuir kategória sira ne’ebé iha.