Díli 14 Fevereiru 2023 – Protesaun Sivil ho prezensa Sekretariu Estadu Protesaun Sivíl, Eng. Joaquim Gusmão Martins no Prezidente Autoridade Protesaun Civil (APC), Superientendente Polísia Ismael da Costa Babo, M.Sc hamutuk ho superior no funsionariu APC fo omenajem ikus ba Saudozu Domingos Pinto Nahak.
Saudozu Domingos Pinto Nahak nu´udar assesor juridiku APC nian ne´ebe hakotu nia iis iha 11 Fevereiru 2023 hafoin halo tratamentu saude iha Jakarta, Indonesia.
Matebian antes asumi kargu assesor juridiku APC nian, eis Direitor Jeral Protesaun Sivil no pessoal ne´ebe mos kontribui ba estabelesementu korpu Bombeiros.
Sekretáriu Estadu Protesaun Sivíl, Eng. Joaquim Gusmão Martins liuhusi lia menon ikus hato´o profundu kondolénsia ba família matebian ne’ebé lakon Aman, lakon Tiu, lakon individu potensiál tebes, individu ida ké kontribui tebes ba luta independensia Timor-Leste.
“Ho dedikasaun tomak Matebian nian, ami hotu iha protesaun sivíl no APC la haluhan ho obra ne’ebé matebian husik hela mai ami,” dehan Eng. Joaquim Gusmão Martins
Entretantu, matebian Domingos Pinto nuudar veteranu ho naran kódigu “Nahak” moris iha loron 3 Junu 1954 iha Munisípiu Viqueque.
Saudozu hahú ninia knaar profisionál hodi asume kargu nuudar Diretór Nasionál Protesaun Sivíl iha tinan 2007 to’o 2015, hafoin hetan konfiansa hodi promove ba Diretór Jerál Operasionál iha Protesaun Sivíl hahú hosi períodu 2015 to’o 2019.
Iha períodu 2019 to’o 2023, matebian asume fali knaar foun hanesan Asesór Jurídiku ba APC nian to’o matebian hakotu is.
Durante ne’e, matebian sofre hela moras kumplikadu hodi deside ba halo tratamentu saúde iha Indonésia, ho esperansa boot hosi família APC ba matebian ninia kondisaun sei rekopera fila-fali, maibé situasaun akontese oin seluk.