Dili, 15 Fevereiru 2023 – Atu fasilita publikasaun ba servisu, programa no atividade Autoridade Proteção Civil (APC) halo koperasaun ho Radio no Televizaun Timor-Leste (RTTL, EP).
Koperasaun entre instituisaun rua ne´e kesi liu hosi Memorandum of Understanding (MoU) ne´ebe asina hosi Prezidenti APC, Superintendente Polisia Ismael da Costa Babo, M.Sc ho Prezidenti RTTL, EP, Jose Taraleu Belo.
Ho asina akordu ne´e, Prezidente RTTL,E.P, José Belo deklara parte RTTL, E.P prontu fó espasu ba APC hodi transmite sira-nia servisu no informasaun ba povu no nasaun.
“Parabéns ba APC sira-nia servisu di’ak hodi presta ita-nia povu no nasaun. Ami RTTL, E.P prontu fó espasu tomak hodi fó sai APC ninia servisu no informasaun iha kualkér momentu. RTTL sempre nakloke 24 óras atu fó espasu boot ba APC atu preense programa,” hateten Prezidente RTTL, E.P.
Entertantu, Sekretariu Estadu Protesaun Sivil (SEPS), Eng. Joaquim Gusmão Martins iha nia intervensaun esplika, koperasaun ne´ebe halo ho objetivu atu halo dessiminasaun informasaun ho formatu produsaun pakote espesial kada mensal.
“Publikasaun televizivu ne´e mos nakloke ba parseiru sira ne´ebe iha ligasaun servisu ho APC bele hamutuk ho ekipa produsaun hodi dezemvolve mos pakote audio-visual ba prevensaun dezastre nian,” dehan sekretariu estadu.
Produsaun pakote espesial ne´e sei produz rasik hosi ekipa multimedia APC iha Gabinete Relasaun Externa no Komunikasaun (GREC).
Partisipa iha asina akordu ne´e Komandante Operasional Nasional no Munisipiu inklui RAEOA, Diretores Nasional sira ne´ebe tutela ba APC no mos parseiru nasional no internasional sira.