Dili, 15 Fevereiru 2023 – Sekretariu Estadu Protesaun Sivil (SEPS), Eng. Joaquim Gusmão Martins offisialmente lansa portal offisial Autoridade Proteção Civil (APC) ho naran domain www.apc.gov.tl , Kuarta (15/2/2023), iha Auditoriu Sentru Formasaun Polisia, Comoro, Dili.
Enkuadra iha Sistema Integrado Seguransa Nasional nian, Sekretariu Estadu esplika, protesaun sivil, mai hodi komplementa, halao papel fundamental/importante iha prevensaun ho resposta ba situasaun asidente, katástrofe ka kalamidade nebé mai husi ita ema nia hahalok ka naturesa nian, haré husi nia gravidade determina oinsa ita halao asaun lalais hodi salva populasaun iha perigu nia laran ho fo fila fali situasaun normal moris nian nebé afeta husi situasaun desastre sira ne’e iha tempu badak nia laran.
Nia esplika tan, APC nian iha Gabinete ida ne´ebe toma konta Relasaun Externa no Komunikasaun ne´ebe nia papel ida maka oinsa divulgasaun ba informasoens relevantes iha matérias de protesaun sivil, inklui oinsa dessimina informasaun mos ba atividade servisu tomak APC nian. Ho ida ne´e maka ohin, APC lansa nia portal offisial www.apc.gov.tl ne´ebe estabelese ho servisu hamutuk TIC Timor nudar meius komunikasaun digital iha era teknolojia modernu ne´ebe fasil atu assesu hosi publiku sira.
“Portal APC hanesan odamatan ba informasaun, atividade no programa APC nian. Liu hosi portal ida ne´e, APC hakarak hakbesik nia servisu iha komunidade sira no mos komunidade sira bele asesu informasaun hou kona ba servisu no atendementu protesaun sivil nian, inklui komunidade bele mos fo ia hanoin ba servisu protesaun sivil nian liu hosi portal neé,” dehan Sekretariu Estadu.
Estabelesementu portal ne´e, sei sai nu’udar uma-na’in ba Baze Dadus Dezastre Timor-Leste (BDDTL) no ligasaun sira atu hetan asesu ba produtu Multi-Hazard Risk and Vulnerability Assessment (MHRVA) no instrumentu sira husi Sistema Responde Emerjensia Timor nian ne’ebé daudaun ne’e dezenvolve hela ho naran Timor Emergency Response System (TERS).
Kriasaun TERS ne´e hetan tulun hosi UNDP liu hosi Projetu Safeguarding Rural Communities and Their Physical Assets from Climate Induced Disasters in Timor-Leste.
Diretór Ezekutivu TIC Timor, I.P, Roberto Caetano de Sousa Vicente iha nia intervensaun badak agradese ba APC ne´ebe fo fiar ona aba TIC Timor hodi dezemvolve portal APC nian.
“Portál APC nian dezenvolve hosi ajénsia TIC Timor hosi ita-nia maluk timor oan sira. TIC Timor atu ajuda instituisaun estadu sira gratuita hodi dezenvolve sistema informátika hanesan website, inklui fo formasaun ba funsionariu sira ne´ebe utiliza portal ne´e, ba oin TIC prontu nafatin atu apoia,” dehan Roberto Vicente.
Iha seremonia lansamentu ne´ebe apoia hosi parseiru UNDP liu hosi projetu Salvaguarda Komunidade Rural no impaktu dezastre hosi mudansa klimatika nian, representante UNDP hateten sira nia parte prontu atu supporta nafatin APC iha programa relasiona ho dezastre naturais nian.
Iha lansamentu ne´e, Prezidenti APC, Superintendente Polisia Ismael da Costa Babo, M.Sc entrega sertifikadu apresiasaun ba TIC Timor ba apoia estabelesementu portal APC nian ne´e.
Partisipa iha lansamentu ne´e Komandante Operasional Nasional no Munisipiu inklui RAEOA, Diretores Nasional sira ne´ebe tutela ba APC no mos parseiru nasional no internasional sira.