KONFERENSIA IMPRENSA: Direitor GREC-APC, Anacleto Caetano wainhira hato´o informasaun ba media sira iha konferensia imprensa kona ba informasaun foun relasiona ho mate isin ba jovem nain 2 ne´ebe hetan ona depois lakon desde 8 Fevereiru 2023. Foto: GREC-APC/Cipriano Mesquita.
Dili, 17 Fevereiro 2023 – Autoridade Protesaun Sivil (APC) relata tan informasaun foun kona ba jovem nain 2 ne´ebe lakon iha sira nia viagem ba Foho Ramelau iha 8 Fevereiru 2023.
Iha konferensia imprensa, Diretór Gabinete Relasaun Eksterna no Komunikasaun (GREC), Anacleto Caetano informa kona-bá joven nain rua ne’ebe lakon ne´e maka Reando Falo (tinan 19) no Orlando Martins (tinan 21).
“Ba sira nain rua nia mate isin hetan ona, Reando Falo idade 19 hetan iha loron 14 fevereiru iha oras 16:30 hafoin ekipa konjunta lori halai ba ospitál maibé lakonsege salva nia moris. Orlando Martins idade 21 hetan iha 16 Fevereiru tuku 13:30, hetan hotu iha area fronteira entre Ainaro no Ermera (Atsabe) ho kondisaun mate,” esplika Anacleto Caetano, Sexta (17/2/2023), iha Salaun Inkontru APC Caicoli, Dili.
Mate isin vitima rua ne´e hetan depois semana ida hafoin halo buska no salvamentu hosi ekipa konjunta husi F-FDTL, PNTL, APC, autoridade lokal no komunidade no familia vitima halo buska no salva durante semana ida.
Mate isin vitima rua ne´e entrega ona ba PNTL hodi halo prosesu autopsia.
Relasiona ona ho kazu ne´e, APC apela ba ema sira ne´ebe halo viajem peregrinasaun ba foho Ramelau tenki kuidadu-an nomós tenki priense rekezitu kondisaun sira ne’ebé mínimu atu salva an husi dezastre.
“Prepara ai-han ne’ebé sufisiente kuandu halo viajem kleur, prepara mós ropa ne’ebé bele asegura ita nia isin husi rai malirin, uza sapatu ne’ebé labele namdoras ka provoka monu nomós di’ak liu informa uluk ba parte autoridade lokal no seguránsa molok sa’e ba foho Ramelau,“ esplika Anacleto.
Portavoz ne’e mos afirma iha tempu badak APC sei servisu hamutuk ho liñas ministriais sira oinsa halo estudu kle’an, hodi ánaliza situasaun no kondisaun iha foho Ramelau, nune’e bele hatene no monta tour guidance sira iha sitiu relijioza Ramelau ne´e.
Text: Mateus da Costa