SIMULASAUN – Membru SDMC halo hela simulasaun ba situasaun emerjensia iha asidente trafiku nian. Foto: GREC-APC/Cipriano Mesquita
Dili, 17 Fevereiru 2023 – ONG Internasional Mercy Corps nu´udar parseiru ba Autoridade Protesaun Sicil (APC) apoia tan ekipamentu protesaun pessoal (EPP) ba suku 15 iha Munisipiu Dili, Sexta (17/2/2023) iha Timor Lodge, Comoro, Dili.
Iha seremonia entrega ekipamentu ne´e, Prezidenti APC, Superintendente PNTL, Ismael da Costa Babo, M.Sc husu ba suku sira atu utiliza ekipamentu sira ho responsabilidade.
“Ekipamentu sira ne’ebé Mercy Corps, União Europeia no KOICA sei fó ba suku sira atu utiliza ho responsabilidade, ekipamentu sira ne’e importante hodi salva ita-nia vida,” dehan Prezidente APC.
Lideransa ne’e, sujere mós ba parseiru sira atu garantia sustentabilidade ba manutensaun ekipamentu, tanba iha situasaun emerjénsia, ekipamentu sira ne’e bele fasilita hodi halo reasaun ba salva vida.
“situasaun dezastre ne’ebé mosu iha ita-nia rai agora no ba futuru mai, ita hotu hamutuk mak bele responde, tanba tuir lei protesaun sivíl ninia parte ida atu halo kordenasaun de’it ho entidade no reskursu tomak, hodi bele halo reasaun rápidu posivel iha situasaun dezastre no emerjénsia,” dehan superior APC ne´e.
Prezidente lori SEPS ho Ministériu Interior agradeses ba Mercy Corps, União Europeia no KOICA, ne’ebé fó tulun ona ekipamentu protesaun pesoál nian.
Entretantu, ekipamentu ne’ebé apoiu ba suku sira mak hanesan Rompi, Kapaset Resgate, Maka, Lona, Kapa Udan, Luvas no Megafone liman, ho ninia kuantidade hamutuk 375.
Textu: Cipriano Mesquita