DILI, 21 Fevereiru 2023 – Governu Japaun liuhusi Embaiaxada Japaun ba Timor-Leste apoia tan kareta tolu Bombeiros nian ba Autoridade Protesaun Sivíl (APC), Tersa, 21 Fevereiro 2023, iha Kaikoli, Dili.
Seremónia entrega kareta ne’e entrega deretamente hosi Embaixador Japaun ba Timor-Leste, Tetsuya Kimura ba Sekretáriu Estadu Protesaun Sivíl, Joaquim Gusmão Martins no assiste deretamente hosi Prezidenti APC, Superintendente PNTL, Ismail da Costa Babo, M.Sc ho nia estrutura tomak.
Iha nia intervensaun, Sekretariu Estadu agradese ba Governu Japaun ne´ebe kontinua nia apoia ba Protesaun Sivil to´o ohin loron.
“Ohin ita marka tan pasu ida, hodi bele kompleta ita nia ekipamentu sira atu apoia ita nia servisu iha kampu. Orgullu tebes ohin bele hamri’ik hamutuk ho embaixador Japaun hodi simu tan viaturas tolu mak hanesan prontu socorru urbanu (PSU) ida no prontu socorru medium (PSM) ida,” hateten Sekretariu Estadu.
Maski simu ona apoia ne´e, sekretariu estadu mos husu atu labele kontente de’it ho sasan sira ne’ebé ita simu maibé ida ne’e responsabilidade bo´ot ba oinsa halo jestaun servisu ida ne’ebe di’ak.
“Povu Japaun ho laran luak entrega tan viaturas tolu ba Bombeiros sira atu uza ba servisu bombeiros nian bainhira akontese dezastre. Laos de’it akontese ahi han, maibé mós dezastre sira seluk ne’ebé ita bele apoia ho kareta ne’ebé ita simu ona,” dehan sekretariu estadu ne´e.
Governu Japaun, esplika sekretariu estadu, sei fo tan formasaun online ba Korpu Bombeiros sira oinsa atu halo operasaun no utiliza viaturas ne’ebé entrega ona.
Governante ne’e, refleta kona-bá situasaun dezastre iha pasadu sai hanesan referénsia traumátiku ne’ebé Timor oan tomak sente akontese iha tinan 2 liu bá iha dia 4 Abríl 2021 mosu inundasaun boot, iha ne’e kedas hetan apoia maka’as husi Japaun imideatamente haruka kedas ajudus ho aviaun liuhusi Malaysia mai Timor hodi fo apoia ba komuniadade sira ne’ebé sai vitima ba dezastre.
Entertantu Embaixador Japaun, Tetsuya Kimura hateten, “Hau fiar katak ho koperasaun hirak ne´e kombina ho fornesementu resposta emerjensia liu hosi kareta bombeiros sira ne´ebe entrega ona ohin ke ajuda povu sira halao moris seguru no protejidu liu tan.”
Nia esplika, iha apoia responde emerjensia, Goovernu Japaun mos fornese ona manta 4.800 hanesan assitensia emerjensia ida ba APC hodi kontribui ba komunidade sira ne´ebe afetadu hodi udan boot no inundasaun no ami mos servisu hamutuk kona ba investimentu hamenus risku dezastre naturais nian atu nune´e nasaun ne´e bele eziste diak liu tan hasoru dezastre naturais oioin.
Governu Japaun, Embaixador Kimura esplika tan, promove ona konseitu ida ho naran seguransa umana idea ida ne´ebe kada pessoal partikularmente ema vulneravel sira bele passa moris ne´ebe seguru no protezidu.
“Koperasaun ne´ebe hau esplika ba konseitu ida ne´e ami sei kontinua obra ho APC no fokus ba resposta emerjensia,” dehan embaixador ne´e.
Textu: Mateus da Costa I Foto: Cipriano Mesquita I Video: Adbin Belo