Dili, 23 Fevereiru 2023 – Autoridade Protesaun Civil (APC) ho International Organization for Migration (IOM) realiza Formasaun Sistema Komandu Insidente iha área finansas no operasionál ba funsionáriu APC, membru PNTL, inklui parseiru internasionál no nasionál hamutuk 45.
Formasaun ne´e hahú hosi 23 Fevereiru to’o 3 marsu 2023 iha salaun City8, Manleuana ho Instrutór ne´ebe fo formasaun ne´e hosi United National Forest Services (USFS), Estadu Unidus Amerika.
Komandante Operasaun Nasionál APC, Superintendente Asistente PNTL, Nuno R. Gomes konsidera formasaun Sistema Komandu Insidente importante atu eleva koñesimentu hodi dezenvolve instituisaun ida-idak nian.
“Ha’u fiar katak liuhusi formasaun avansadu ida ne’e atu mellora di’ak liu tan ita-nia koñesimentu hodi kontribui ba dezenvolvimentu instituisaun nian, maské ita mai hosi instituisaun diferente,” hateten Komandante Operasaun Nasionál APC.
Komandante esklarese rekursu instituisaun sira ne’ebé partisipa iha formasaun ida ne’e, parte hosi rekursu APC nian, tanba politika governu através lei seguransa nasionál fó kompeténsia ba APC atu halo kordenasaun ho liña ministeriál, parseiru internasionál, nasionál, no ONG sira atu fó apoiu APC iha asuntu dezastre naturais.
Funsionáriu no kargu Xéfia APC ne’ebé mak inklui iha formasaun hamutuk 28, mai hosi Bombeiros, DNPKK, DNGRD hosi nasionál ho munisípiu sira.
Enteretantu, formasaun Sistema Komandu Insidente hanesan kontinuasaun hosi primeiru etapa ne´ebe realiza ona iha setembru 2022, foka liubá área lojistika nian.
Textu no Foto: Cipriano Mesquita