DILI, 14 Marsu 2023 – Organizasaun Internasionál ba Migrasaun (IOM), ho fundu laran-luak hosi Governu Japaun, apoia pakote sasán emerjénsia (NFIs) 900 no kontentór movél ida (1) ba Autoridade Protesaun Sivil (APC) ne’ebé entrega deretamente hosi Xefi Misaun IOM Timor-Leste Ihma ba Sekretariu Estadu Protesaun Sivil, Joaquim Gusmão Martins ho prezensa embaixadora Japaun ba Timor-Leste, Tetsuya Kimura, Tersa-feira (14/3) iha Kuartel Unidade Espesial Protesaun Sivil, Kampung Baru, Dili.
Seremónia entrega ida-ne’e nu’udar parte ida hosi IOM nia projetu, Hamenus Risku Dezastre no Habo’ot Preparasaun Emerjénsia iha kontestu COVID-19 ba Timór-Leste, ne’ebé buka atu hamenus risku dezastre no habo’ot preparasaun ba dezastre sira aban-bainrua.
IOM entre pakote NFIs 900 no armazén movél ida, ne’ebé sei benefísia ema 4,500 (família 900) ba sira-nia nesesidade krítika atu mellora kondisaun moris populasaun vulnerável sira durante dezlokamentu. Pakote NFI ida inklui sasán ijiene, sasán dapur, fatin toba no matéria prevensaun COVID-19.
Sasán sira espesífiku ba feto no labarik-feto mós inkluidu, atu mitiga risku VBJ durante emerjénsia. Sasán sira hotu-hotu ne’e la’o-tuir ho padraun Sphere no Dekretu-Lei Protesaun Sivíl nian. Pakote NFIs, armazén movél, no atividade kapasitasaun kona-ba distribuisaun NFI sei aumenta Timor-Leste nia preparasaun emerjénsia ba krize futuru.
“Ho oferese pakote NFIs no armazén ba Governu ne’e importante ba paíz atu responde no prepara di’akliu ba dezastre sira futuru. Importante liu-liu, ida-ne’e mós sei kontribui ba hamenus risku COVID-19 no violénsia bazeia ba jéneru (VBJ) iha sentru evakuasaun sira,” tenik Ihma Shareef, Xefe-Misaun IOM ba Timor-Leste.
Desde Fevereiru 2022, projetu ne’e treina ona pesoál governu no membru komunidade na’in 218 kona-ba oinsá halo distribuisaun asisténsia iha emerjénsia ba populasaun vulnerável sira. Sentru evakuasaun neen hetan avalia no renova ona iha Dili, Manatuto, no Viqueque. Sentru Sentru evakuasaun hirak-ne sei mellora asesu ba ema 32,000 resin ba fatin-abrigu nebe seguru no dignu iha sira-nia suku ida-idak, durante emerjénsia.
Sekretariu Estadu Protesaun Sivil, Joaquim Gusmão Martins lori governu no protesaun sivil nia naran agradese ba apoia ne´ebe IOM fo.
“Apoia ne´e hanesan provas ida ba koperasaun ne´ebe iha katak Governu la depende deit ba orsamentu estadu ne´ebe iha, maibe ho koperasaun ne´ebe ih abele kompleta liu tan servisu ne´ebe ita iha. Parseiru sira la persiza fo osan, maibe parseiru sira fo deit sasan ne´ebe iha hodi bele kompleta sasan ne´ebe governu prepara ona ne´esai ajudu ida ne´ebe maka importante teb-tebes ba iha governu ba iha protesaun sivil, ho nunee hodi naran governu no protesaun sivil hakarak agredese ba apoia ne´ebe ohin simu ona no bele kedan uza karik akontese dezastre,” dehan sekretariu estadu.
Iha ninia deklarasaun, Tetsuya Kimura, Embaixadór no Plenipotensiáriu Japaun ba Repúblika Demokrátika Timór-Leste hatete, “Japaun mós nasaun ida vulnerálvel ba dezastre, ne’ebé hasoru dezastre barak iha pasadu. Ha’u fiar katak Japaun bele fahe koñesimentu no esperiénsia ne’ebé ami hetan iha pasadu. Japaun koopera ho governu TL liuhosi projetu oioin ba kada síkulu Redusaun Risku Dezastre (RRD). Ami haree importante atu lida asuntu sira ligadu ba dezastre ho komprensivu.”
Projetu ne’e mós inklui IOM nia esforsu atu tulun governu ba introdúz abordajen protesaun, inklui risku VBJ durante emerjénsia, oferese espasu seguru ba grupu vulnerável sira durante dezastre, no sensibiliza komunidade kona-ba preparasaun dezastre no sistema alerta sedu.
Reportazem: Cipriano Mesquita