Dili, 21 marsu 2023 – Governu Timor-Leste ho Governu Norte Territoriu realiza inkontru bilateral hodi hahu diskusaun ba koperasaun servisu emerjensia nian ne´ebe sei halo iha futuru.
Parte Governu Timor-Leste nian lidera hosi Vise-Ministru Interior, Antonio Armindo, hamutuk ho Sekretariu Estadu Protesaun Sivíl, Joaquim José Gusmão dos Reis Martins no Prezidenti Autoridade Proteção Civil (APC) interinu, Superintendente Assitenti Nuno Romualdo Gomes no parte Governu Norte Teritoriu nian lidera hosi Komisariu Polisia Norte Teritóriu Austrália, Jamie Chalker ho komitiva.
“Ohin ita halo enkontru bilateral ho delegasaun Guvernu Norte Teritóriu Austrália ne’ebe xefia hosi Komisariu Polisia Jamie Chalker ho dosente sira hosi Universidade Charles Darwin hodi koalia kona-ba kooperasaun iha area sira ne’ebe maka kobre hosi Protesaun Sivil nian no-mos area PNTL nian,” esplika SEPS Joaquim José Gusmão dos Reis Martins ba jornalista sira iha sala enkontru TLPDP, Hudi Laran, Bairo-Pite, Tersa (21/03/2023).
Nia esklarese, enkontru ne’e realiza tanba antes ne’e Governu Timor-Leste liuhosi Ministra Negósius Estranjeirus no Kooperasaun, Adaljiza Magno no Ministra Xefe Norte Teritóriu Austrália, Natasha Fyles, asina ona akordu Parseria Estratéjika iha Parlamentu Darwin-Australia no akrodu foun ne’e sei validu to’o tinan 2026.
“Ita nia nai Primeiru-Ministru Taur Matan Ruak, iha fulan fevereiru ho komitiva halo ona vizita ba Darwin hodi asina akordu ida importante tebes ba Timor-Leste no Governu Norte Teritóriu hodi hare ba setor estratéjiku sira hanesan, komérsiu, negosius, agrikultura, turizmu, petróliu no minerais inklui jestaun emerjensia nian. Entaun ida ne’e hanesan atu follow up fali MoU ne’ebe asina ona entre Guvernu Timor-Leste no Guvernu Norte Teritóriu Austrália,” dehan Sekretariu Estadu.
Sekretariu Estadu ne´e mos esplika, inkontru bilateral ne´e hanesan inkontru inunsiu hodi fahe esperensia servisu entre rai rua nian iha area protesaun sivil, liliu oinsa responde situasaun emerjensia iha kualker dezastre.
Governu Norte Teritoriu, informa Komisariu Jamie Chalker, prontu atu kopera ho Timor-Leste no apoia servisu emerjensia no reziliensia ba dezastre iha futuru.
“Ami prontu sai parseiru forte ba Timor-Leste iha servisu emerjensia nian,” hateten Jamie Chalker.
Governu Australia, iha Abril 2021 fo apoia osan AUD7.5 milhoens ba inundasaun ne´ebe akontese, inklui fornesimentu ai-han no asisténsia médika no-mos apoia kapasidade resposta umanitária no dezastre husi Forsa Defeza Timor-Leste (F-FDTL) no Forsa Polisia Timor-Leste (PNTL).
Hola prezensa mos iha inkontru ne´e Komandante ba Programa Dezenvolvimentu Polísia Timór-Leste (sigla Inglés TLPDP), Superintendente Darren Booy no superior balun APC nian.
Textu: Mateus da Costa I Foto & Video: Cipriano Mesquita