Dili, 30 Marsu 2023- The World Bank (WB) realiza enkontru kona-ba avaliasaun jestaun finanséira públika ne’ebé rezilíente no responsiva ba dezastre (JFPRD) iha Timor-Leste, ne’ebe hala’o iha salaun Hotel Timor Dili, Kinta (30/3/2023).
Iha enkontru ne’e, Autoridade Proteção Coivil (APC) hetan mos konvite husi WB atu partisipa nomós hato’o asuntu balun ne’ebé liga ba finansiamentu públika APC nian bainhira akontese dezastre ruma no oinsa halo prevensaun ba resposta sira ligadu ba servisu APC nia asistensia sira bainhira iha tempu dezastre nomos hafoin dezastre.
Iha biban ida ne’e reprezentante Prezidente APC, Virgilio dos Santos Soares atual Diretur Nasional Jestaun Rekursu (DNGR) dehan workshop ohin loron hare’e liu ba reziliensia no dezastre iha Timor-Leste, oinsa ita asesu orsamentu ne’ebé mak la sufisiente bainhira akontese dezastre ne’ebé boot ho kapasidade ne’ebe boot karik akontese iha futuru.
“Planu orsamentu ba DNGR, fo hanoin mós ba ita para oinsa prepara orsamentu ne’e ho di’ak ba futuru hodi identifika didi’ak prioridade ita presiza nesesita iha servisu operasional,” nia esplika.
Workshop ne´e mos hetan partisipasaun husi liñas ministeriál sira mak hanesan Reprezentante Ministeriu Finansas, Ministeriu Obras Públikas, Ministeriu Planu no Ordenamentu, Ministeriu Estatal, Sekretaria Estadu Meiu Ambiente, nomos parseiru WB balun.
Foto & Textu: Mateus da Costa