Dili, 25 Abríl 2023- Autoridade Proteção Civil (APC) liuhusi Komando Operasionál Nasionál Protesaun Sivil (CNOPS) Superintendente Assistente, Nunu Rumoaldo Gomes entrega kareta operasional 5 no motor 1 ba komando operasional munisipal neen iha edifísiu Central APC-Kaikoli Dili, Tersa 25 Abríl 2023.
Iha seremónia entrega transporte ne’e, Superintendnete Assistente, Nunu Rumualdo Gomes hateten kareta ne’ebé entrega ne´e laos kareta kargu nian, maibe hdi uza ba operasional ba atividade rutina nian iha munisipiu.
“Kareta ida ne’e, ita boot sira koko atu halo jestaun atu bele fó apoia ba servisu diresaun sira hanesan DNSPPP, DNPKK, DNGRD nomos Bombeiros hodi mós identifika kondutór sira ne’ebé iha karta kondusaun no disiplina kontrola nune’e bele kuidadu viaturas sira ne’e tuir lojístika haruka ” dehan Komandante Operasional Nasional APC ne´e.
Ema numeru rua iha APC ne´e mos apela atu uza kareta ne´e ho kuidadu no kontrola iha velosidade nian wainhira halo servisu operasional nian iha terrenu.
Iha fatin hanesan, Komandante APC Munisípiu Aileu, Inspektúr Xefi, Helio da Conceição de Deus hato’o nia agradesementu ba APC nasionál ne’ebé fó ona apoia viaturas transporte Ba sira hodi fasilita servisu APC nian iha Munisipiu Aileu.
“Agradese ba Protesaun Sivil tantu governu ne’ebé oferese ona transporte kada munisipiu ida-idak, ho fasilidade ne’ebé mak iha ami fiar katak bele mellora di’ak liutan ami nia servisu operasionalmente tuir servisu diresaun sira ne’ebé iha,” dehan Komandante APC Aileu ne´e.
Komando APC Munisipiu ne´ebe simu kareta operasional ne´e maka Munisípiu Aileu simu kareta 1, Bobonaro 1, Manufahi 1, Munisípiu Atauro 1, Baucau 1, no Ainaro 1 ho motor 1.
Textu no Imajen : Mateus da Costa