Dili, 08 maiu 2023-Mediadór ho Xefe Departamentu foun hosi Diresaun Nasionál Prevensaun Konflitu Komunitáriu, Autoridade Protesaun Sivil (DNPKK-APC) hetan formasaun kona-ba Lideransa Transformativa no Igualdade Jéneru iha Suai Room, Timor-Plaza.
Iha abertura, Komandante Operasaun Nasionál APC, Superientendente Asistente PNTL, Nuno Romualdo Gomes hateten ho formasaun lideransa transformativa atu kontibui ba servisu mediadór no Xefe Departamentu foun ninia servisu ho di’ak liután
“Formasaun lideransa importante los, atu kapasita di’ak liutan koñesimentu mediadór sira-nian hodi hala’o servisu ho di’ak, atu kontribui ba hametin pás no redusaun konflitu iha komunidade sira-nia leet,” esplika Komandante Nuno.
Segundu Lideransa APC ne’e, konsidera mediadór ninia serviu barak liu iha tereñu, ho kbiit atu halo kordenasaun ho autoridade lokál no entidade sira hodi haree ba kazu disputa no konflitu sira.
Enkuantu, Reprezentante UN WOMEN iha Timor-Leste, Flora Wai Shan Chan hateten dezde kedas iha Covid 19 iha 2020 formasaun lideransa tranformativa hala’o hamutuk UN WOMEN, DNPKK ho JU,S atu haree kona-ba justisa liga ho mediador sira-nia servisu hodi responde ba violénsia bazeia ba jéneru liuliu igualdade jéneru iha TL.
Ko’alia kona-ba pás nasionál iha TL, Nia konsidera mediadór DNPKK sira-nia papel importante tebes iha sosiedade iha Timor-Leste, atu asegura no garantia hodi fó asesu justisa ba ema hotu-hotu, inklui violénsia bazeia ba jéneru liuliu ba feto, labarik feto sira no grupu vulneravél sira iha TL.
Konsultora Internasionál ne’e, fó parabens ba mediadór DNPKK sira-nia servisu mediasaun, ne’ebé konsege fó ona solusaun ba kazu hamutuk kuaze 200 hosi kazu 400, ne’ebé DNPKK rejistu iha tinan 2021, no iha tinan 2022 solusiona tan kazu hamutuk 166, ida ne’e hatudu servisu mediadór DNPKK 45% hetan rezultadu di’ak no susesu.
Entrentantu partisipante iha treinamentu hamutuk 50 kompostu hosi Xefe Departamentu DNPKK foun hosi munisípiu Aileu, Ainaro, Ataúro, Baukau, Bobonaro, Kovalima, Manatuto, Manufahi, RAEOA, Vikeke, Laútem, inklui mediadór hosi munisípiu 12, no RAEOA.
Formasaun ne’e, hala’o durante loron haat, hahú hosi 08 too 11 maiu 2023, ne’eb’e fasilita hosi matéria hosi fasilitadór DNPKK ho UN WOMEN, no fundu hosi governu Swédia.
Textu & Foto, Cipriano GREC