GLENO, 15 juñu 2023- Autoridade Protesaun Sivíl (APC) ho United National Disaster Risk Reduction (UNDRR) halo konsultasaun nivel komunitária ho autoridade lokál no lideransa komunitária iha Munisípiu Ermera kona-ba Revizaun Termu Médiu ba Enkuardamentu Sendai Framework ba Redusaun Risku Dezastre.
Adjunto Operasaun Aero APC, Mariano Ana Lopes hateten liuhusi konsultasaun komunitária ho atu kontribui idea ba revizaun médiu termu ba Sendai liga ho redusaun risku dezastre iha TL.
“TL hanesan nasaun membru ONU ita adota enkuardamentu Sendai hosi 2015 too 2030 tanba ita iha tinan 2023 persija halo avaliasaun liga ho atividade sira redusaun risku dezastre nian,” esplika Adjunto.
Nia hatutan, “Konsultasaun atu diskute hodi haree atividade redusaun riksu dezastre ne’ebé mak autoridade lokál no lideransa komunitária halo ona, saida mak halo daudaun no saida mak atu halo iha futuru mai no hadia atividade ne’ebé halo no atu ajusta ho atividade sira ne’ebé ita adota iha enkuardamentu Sendai nian.”
Reprezentante Komandante Operasaun Nasionál APC haktuir atividade redusaun risku dezastre iha siklu preparasaun, prevensaun, mitigasaun, resposta no rekoperasaun.
Iha fatin hanesan Reprezentante UNDRR, Md. Ehsanul Hoque hateten konsultasaun komunitária iha nivel munisipál hanesan munisípiu Ermera ho RAEOA atu garante ema hotu-hotu nia lian kona-ba dezastre nian, tanba dezatre baibain akontese iha suku sira iha munisípiu mós.
Fasilita konsultasaun UNDRR hosi Md. Ehsanul Hoque, Cirilo de Jesus, ho Adjunto Operasaun Aero APC, Mariano Ana Lopes.
Entretantu, atividade konsultasaun envolve partisipante besik 30 kompostu hosi Administradór Postu, Xefe Suku, ONG, inklui APC sira iha munisípiu Ermera.
Foto & Textu: Cipriano Mesquita