𝐖𝐎𝐑𝐊𝐒𝐇𝐎𝐏 𝐕𝐀𝐋𝐈𝐃𝐀𝐒𝐀𝐔𝐍 𝐒𝐎𝐏 𝐁𝐀 𝐓𝐑𝐀́𝐅𝐈𝐊𝐔 𝐔𝐌𝐀𝐍𝐔 𝐍𝐎 𝐕𝐁𝐉 𝐈𝐇𝐀 𝐄𝐌𝐄𝐑𝐉𝐄́𝐍𝐒𝐈𝐀

Dili-27 Jullu 2023-IOM ho apoiu USAID realiza workshop validasaun  Standar Operation Procedures (SOP) kona-bá Trafficking in Person Emergencies and Gender Based Violence in Emergencies, ne’ebé envolve APC, PNTL, F-FDTL no liña ministeriál sira atu kontribui idea no sujestaun hodi dezenvolve SOP refere.

Prezidente APC, Superientendente PNTL, Ismael da Costa Babo konsidera ho validasaun ba Standar Operating Procedures (SOP) importante sai matadalan no isntrumentu estadu Timor-Leste nian hodi servisu iha situasaun emerjénsia liuliu ba tráfiku umanu no violénsia bazei ba jéneru nian.

“IOM ho USAID apoiu hodi dezenvolve giaun SOP ba TL hodi bele servisu iha situasaun emerjénsia liuliu ba tráfiku umanu no violénsia bazeia ba jéneru. SOP lubuk ida mak iha ona hodi kompleta mellora ita-nia servisu,” dehan Prezidente APC.

Lideránsa Másimu APC afirma SOP bele mós kompleta servisu ba oin no sai madatalan nasionál protesaun sivíl iha Timor-Leste.

“SOP ida ne’e sai giaun no ita tenta lori ba Konsellu Ministru atu bele iha rezolusaun governu ida hodi sai matadalan nasionál ba servisu emerjénsia iha protesaun sivil, PNTL no F-FDTL inklui liña ministerial sira no parseiru nasionál sira atu komunga,” dehan Superientendente Babo.

 Liga ho situasaun emerjénsia, Prezidente APC haktuir “Esperénsia iha 04 abril 2021 akontese siklona seroja  iha ita nia territóriu nasionál no foin lalais mosu dezastre naturais liubá ita-nia mekanizmu kordenasaun no atendementu  liuliu ba ita nia alin feto, inan feto, ema ho defisiensia mak sai vulneravél liuliu tanba ne’e ho SOP bele mellora di’ak liu servisu ba oin.

Primeiru Prezidente APC hateten validasaun SOP ida ne’e sei esbosu hela, tanba husu ba partisipante hotu atu apoiu no kontribui ideas, sujestaun hodi bele mellora no komplete tan SOP mais adekuadu tuir realidade ambiente TL nian.

Iha fatin hanesan, Diretora Misaun USAID, Zema Semunegus hateten “Ita hotu iha ida-idak nia papél atu kontribui no governu EUA liuhusi ninia eskritóriu ba apoiu umanitária espera atu apoia hodi implementa Timor-Leste ninia esforsu ba atinje rezilénsia dezastre.