Dili, 05 setembru 2023- Estrutura nivel altu Autoridade Protesaun Sivíl (APC) ho UN Office For Disaster Risk Reduction (UNDRR) realiza workshop loron ida hodi halo validasaun interna ba Revizaun Termu Médiu Enkuardamentu Sendai 2015-2023, ligadu ho prevensaun risku dezastre.
Workshop hala’o iha salaun APC, Kaikoli ne’ebé envolve Diretór Gabinente, Diretór Nasionál, Komandante Operasaun APC ho ninia Adjunto hosi munisípiu 14, inklui RAEOA ho Ataúro.
Prezidente Autoridade Protesaun Sivíl, Superintendente PNTL, Ismael da Costa Babo iha abertura hateten objetivu hosi workshop validasaun atu kontribui ideia hodi dezenvolve enkuardamentu Sendai ida ne’e nuudar instrumentu ida atu implementa iha Timor-Leste.
“Ita-nia kontribuisaun importante ba revizaun Sendai ida ne’e, tanba atu promove TL iha organizasaun mundiál ka ONU katak ita ativamente partisipa iha produsaun ba perevensaun risku dezastre,” afirmasaun Prezidente APC.
Nia hatutan “Validasaun atu aprende ba malu, kontribui ideia foun ruma hodi dezenvolve relatóriu ida ne’e. Validasaun halo interna ba ita, no planu ba oin sei halo validasaun ho liña ministeriál sira, ikus liu ho parseiru dezenvolvimentu sira hanesan ONU, liuliu ho parseiru internasionál no nasionál sira.”
Primeiru Lideransa APC konsidera Timor-Leste parte ida hosi Nasoens Unidas, ho nunee rezolusaun ONU nian saida de’it tenke asegura, implementa hodi fó benefísiu ba nasau rasik.
Ikus liu, Prezidente Babo lori governu nia naran hatoo agrdese ba UNDRR, ne’ebé apoiu elabora no finaliza dokumentu refere.
“APC mak sei implementa instrumentu ida ne’e, haklaken, no promove instrumentu ida ba TL nia naran iha mundiál, tanba ita-nia kontribuisaun ideia foun importante tebes. Ita mak jestór, ita mak nain hodi inisia ba prevensaun risku dezastre,” esplika Prezidente APC.
Iha fatin hanesan, Reprezentante hosi UNDRR iha Timor-Leste, Cirilio de Jesus Lobo Batista hateten UNDRR ninia knaar no mandatu atu ajuda APC, oinsa atu fornese no guia tékniku ruma ba APC liga ho redusaun risku dezastre.
Hafoin finaliza validasaun dokumentu refere sei sumbete ba Konsellu Ministru hodi hetan aprovasaun hodi haruka ba Ministériu Negósiu Entranjeirus no Koperasaun (MNEK), kontinua enkamiña ba Nova Iorke, Estadus Unidos Amérika.
Entretantu, antes APC ho UNDRR halo ona konsultasaun ho autoridade lokál no lider komunitária sira hosi munisípiu Ermera no RAEOA liga ho Revizaun Termu Médiu Enkuardamentu Sendai 2015-2023.