Dili, 15 setembro 2023-Autoridade Protesaun Sivíl (APC) liuhusi Komandante Operasaun APC Nasionál, Superintendente Asistente PNTL, Nuno Romualdo Gomes akompaña hosi Adjunto Operasaun terestre, Martinho Fátima sorumutu ho parseiru internasionál sira hanesan UN Ajénsia, ONG nasionál no internasionál sira hodi diskute kona-ba preparasaun atu responde ba el ninu ka bailoron naruk iha Timor-Leste.
Komandante Operasaun APC Nasionál, Superintendente Asistente PNTL, Nuno Romualdo Gomes hateten enkontru ida importante tebes atu garantia kordenasaun hosi parte grupu umanitáriu kona-ba preparasaun el ninu liuliu implementa preparasaun antes, resposte no rekoperasaun ba el ninu.
“Parte governu liuhusi APC nafatin hamutuk ho parseiru sira. APC nia serbisu mak atu garantia koordenasaun ida ne’ebé mak diak hodi bele prodús rezultadu ne’ebé di’ak iha esforsu umanitáriu,” hateten Komandante Nuno.
Nia konsidera kestaun el ninu sai problema sériu tebes persija kordenasaun di’ak hodi atu bele responde hodi redus risku ba konflitu.
“Problema el ninu sériu tebes, husu ba parsériu sira-nia vontade di’ak no mekanizmu koordenasaun didiak hodi bele atinje objetivu ruma iha ámbitu ba iha situasaun ne’ebé ita hotu sei hasoru, hodi nune bele hamenus dezastre no risku,” afirmasaun Komandante .
Segundu Lideransa APC husu ba parseiru sira atu servisu besik liubá komunidade sira iha área rurál atu sira bele assesu ba ajuda umanitáriu sira ho lais. Liuhusi ajudu umanitáriu, Governo hein katak ajudu sira ne’e bele dignifika duni populasaun hirak ne’ebé vulneravél.
Iha parte seluk, Nia mós husu ba parseiru umanitáriu sira atu envolve mós lidér relijiozu no setór privadu sira ba iha resposta bainhira mosu dezastre no atu ajuda Governo hodi fahe ona informasaun ba ajente lokál sira, hodi nune’e bele masimiza liután atividade preparasaun ida ne’ebé efisiente liu.
Reuniaun preparasaun bae El ninu ne’e organiza hosi UN iha Timor-Leste, ne’ebé loke ofisialmente hosi Komandante Operasaun APC Nasionál, Superintendente Asistente PNTL, Nuno Romualdo Gomes ho UN Resident Coordenator. Ms. Fummi Balogun.
Foto no Textu : Cipry (GREC-APC)