Manatuto, 23 Outobru 2023- Autoridade Proteção Civil (APC) liuhusi Diresaun Nasional Jestaun Risku Dezastre hala’o sensibilizasaun kona-bá Hasa’e Koñesimentu liuhusi Kampaña Edukativu ba Eskola Ensinu Central iha Área Risku Dezastre, ne’eb’e realiza salaun Eskola Aiteas No 321 Postu Administrativu Manatuto Vila, Munisípiu Manatuto, Segunda-Feira 23 Outonbru 2023.
Kampaña Edukativu kona-bá Redusaun risku dezastre ne’e ho objetivu atu fó koñesimentu ne’ebé báziku no mós kle’an atu estudante sira iha nível eskola bele aprende no apar oinsa halo prevensaun bainhira ka molok akontese dezastre no depois akontese dezastre.
Xefe Departamentu DNGRD sr. Laurentino do Carmo hanesan mós Fasilitadór ba programa edukativu ida ne’e, nu’udar baze importante ida atu fahe informasaun ba alin estudante nune’e bele halo prevensaun ruma bainhira akontese dezastre
“Presiza fahe informasaun no koñesimentu ba alin estudante sira nune’e bele hatene saida mak dezastre naturais, tamba dalabarak liu estudante barak mak sai vítima bainhira akontese dezastre liuliu iha tempu udan atu hakat mota” dehan Laurentino do Carmo
Iha fatin hanesan Komadante Operasionál APC Munisípiu Manatuto Sup. Assistante sr. Tomas da Costa hateten programa sensibilizasaun ida ne’e atu kapasita koñesimentu estudante sira ne’ebé liuliu hela besik área risku dezastre
“ Hasa’e koñesimentu estudante Aiteas kona-bá dezastre hanesan programa edukativu oinsa atu partilla informasaun ba alin estudante sira kona-bá dezastre no tipu dezastre sira nomós buka fatin seguru sira bainhira akontese dezastre boot sira no halai ba fatin evakuasaun ka fatin seguru sira” dehan Sup. Assistante sr. Tomas da Costa
Reprezentante Diretór Eskola Central Aiteas Domingas Soares hateten agradese wain ba estadu liuhusi APC ne’ebé mai habelar koñesimentu sira nia ona sira
“Ha’u louva teb-tebes ba APC atu hasa’e kapasidade koñesimentu ami nia estudante sira hodi bele hatene programa edukativu ida ne’e liuliu kona-bá risku dezastre ne’e rasik no oinsa nia prevensaun ” Esplika Reprezentante Diretór Eskola Aiteas sra. Domingas Soares
Iha biban ida ne’e estudante Aiteas Jolicia Madalena Carvalho B. da Silva hanesan mós partisipante husi programa edukativu ida ne’e senti kontenti tebes ho fasilitador husi programa edukativu Redusaun Risku Dezastre ne’e
“Ha’u agredese no senti kontenti APC bele fó koñesimentu kona-bá dezastre naturais ne’e rasik nomós ho fasilitador sira ne’e hanorin kapas teb-tebes ami “ hateten estudante Jolicia Madalena Carvalho B. da Silva
Programa edukativu ida ne’e interaktivu tebes tamba hetan partisipasaun mázimu husi partisipantes no fasilitador ho mós prezensa husi parseiru APC MercyCorps.
foto no Textu: Micho (GREC-APC)