“Hasa’e koñesimentu estudante sira kona-bá Redusaun Risku Dezastre sai programa importante Autoridade Proteção Civil iha Timor-Leste”.
Asuntu ne’e hateten husi Xefe departamentu Diresaun Nasionál Jestaun Risku Dezastre sr. Laurentino do Carmo hanesan mós fasilitadór bainhira halo sensibilizasaun kona-bá “Kampaña Edukativu” iha Ensinu Báziku Central Cribas, iha ámbitu komemorasaun loron Mundiál Dezastre iha Suku Cribas, Postu Administrativu Manatuto Vila, Munisípiu Manatuto , Segunda-Feira 23 Outubru 2023.
“Programa Kampaña edukativu ida ne’e, programa importante tebes hodi loke koñesimentu kle’an estudante kona-bá dezastre, hanesan programa kontinuasaun ba redusaun risku dezastre ne’ebé implementa iha 2011 ho apoia husi UNESCO “ hatutan fasilitador Laurentino do Carmo
Objetivu kampaña edukativu ida ne’e, atu hasa’e koñesimentu estudante sira hotu kona-bá redusaun risku dezastre nomós oinsa halo prevensaun ba-an no ba ema seluk bainhira akontese dezastre, molok mosu dezastre no hafoin mosu dezastre.
Diretór Eskola EBC Cribas sr. Rosário C. N. das Neves fó nia intervensaun ; haksolok tebes ba programa edukativu ne’ebé APC mai sensibiliza iha sira nia eskola
“Ami kontenti tebes programa edukativu ne’ebé lidera husi APC fó duni abilidade no koñesimentu foun ba ami nia oan sira iha eskola Cribas ida ne’e, oinsa atu hatene oinsa halo prevensaun bainhira akontese dezastre tantu bele transforma família sira iha komunidade sira nia le’et nune’e bele halo asaun prevensaun hodi resposta ba dezastre bainhira mosu”
Iha sorin seluk estudante Julião Bernando da Silva hanesan mós partisipasaun iha atividade agradese tebes ba programa Kampaña Edukativu ida ne’e mellora nomós loke sira nia koñesimentu kona-bá dezastre sira
“Ha’u agradese tebes bele aprende buat foun liuliu kona-bá informasaun saida mak dezastre, oinsa halo prevensaun bainhira akontese dezastre nomós depois dezastre no saida de’it mak nia impaktu husi tipu dezastre hanesan Inundasaun ka Be’e sa’e, Tsunami ka tasi sa’e, Rai monu ka rai halai, Anin boot, udan Boot, no seluk tan”
Kampaña Edukativu ida ne’e hetan partisipasaun másima husi estudante no estrutura eskola EBC Cribas
Foto no Textu: Mateus (GREC-APC)