Dili – 23 Outubro 2023 – Autoridade Proteção Civil (APC) liuhusi Porta-Voz APC Anacleto Caetano, atuál Diretor Relasaun Externa no Komunikasaun (GREC) relata dadus dezastre naturais semanál ba públiku kuaze xefe familia 23 mak nia uma hetan estragus no lakon vida nain ida mate, tamba impaktu husi dezastre naturais.
Informasaun ne’e relata ba públiku Timor-Leste, hafoin APC halo konferénsia imprensa iha salaun konferénsia APC Kaikoli -Dili, 23 de Outubro 2023.
CNOPC-APC no Bombeiros iha semana ne’e rejista dezastre Naturais hamutuk 23 no mate 1. “APC kontinua aktualiza informasaun ne’ebé liga ho akontesimentu dezastre iha territóriu laran tomak, hahu husi loron 17-23 Outubro 2023.
Durante semana ida ne’e, iha rejiaun Timor-Leste normal no akontese tipu dezastre maka CNOPC-APC rejistu uma hamutuk xefi famílias 23 mak hetan estragus no ema mate 1.
Munisipiu sira ne’ebé hetan estragus mak hanesan: Aileu, Ainaro, Bobonaro, Ermera, Lautem, Likisa, RAEOA no Vikeke”, dehan Porta Voz APC Anacleto Caetano. Nia salienta liutan, tipo dezastre sira ne’ebé akontese durante semana ne’e iha oin rua mak Anin bot no Ahi han uma ka sasan.
Husi akontesimentu hirak ne’e, Munisípiu Ermera mak hetan estragus barak liu, hamutuk (Anin sobu uma 11, ahi han 1 no lakon vida ka mate 1). Enkuantu Munisípiu sira seluk mak hanesan, Munisipiu Aileu (Ahi han 1), Munisipiu Ainaro (Ahi han Uma 1), Munisipiu Bononaro (Anin sobu 2), Munisípiu Lautem (Anin sobu uma 2, Ahi han 1), Munisipiu Likisa (Anin sobu uma 1 no Ahi han 1), RAEOA (Ahi han 1), Munisipiu Viqueque (Anin sobu uma 1).
Tuir Anacleto Caetano katak, hare husi rezultadu ne’ebé fo sai hatudu dezastre husi anin sobu komunidade nia uma no sasan mak barak liu durante semana ida ne’e. Nune’e, porta- voz APC ne’e, alerta nafatin ba populasaun sira atu kuidadu an nafatin no hado’ok an husi fatin sira nebe fasil atu hetan dezastre Naturais.
Vítima sira ne’ebé afeitadu ba dezastre naturais semana ne’e, tuir porta-voz ne’e katak Komando APC Munisípiu sira serbisu hamutuk ho parseirus relevante sira fornese ona asisténsia emerjénsia ba família afetadus sira hanesan Ai-han no laos Ai-han (food item & Non-food Item).
Enkuantu ba familia sira ne’ebé seidauk hetan apoiu, Komando Operasional APC Munisipiu sira kontinua nafatin halo hela levantamentu detaillus kona-bá sasan ne’ebé estragus no lakon. Atu nue’e sira mós bele hetan hotu apoiu sira husi Autoridade Protesaun Sivíl.
Foto no Textu: Cirpy & Nato (GREC-APC)