Manufahi, 24 Novembru 2023 – APC ho FAO organiza workshop validasaun Relatóriu Avaliasaun Vulnerabilidade, Risku, Perigu no Plano Jestaun Risku Dezastre (AVRP-JRDBK) ne’ebé prepara husi KJDS Suku Fatu-Kahi no Suku Fatu-Kesi, Posto Administrativu Fatuberliu, Munisípiu Manufahi. Atividade workshop ne’e, halo iha Salaun Administrasaun Munisípiu Manufahi, Sexta-Feira semana ne’e.
Workshop refere loke husi reprezentante Administradór Munisípiu Manufahi, Julio Godinho, hamutuk ho Komandante Operasaun APC Munisípiu Manufahi no DNGRD.
Iha liafuan Bem-Vindo, komandante APC Manufahi Inspektór Polisia Nivio Celestinho Jerónimo Baptista hateten workshop validasaun ne’e importante tebes hodi valida fali serbisu KJDS sira nian.
”Workshop ida ne’e importante tebes atu nune’e hodi reforsa liutan serbisu APC munisípiu Manufahi ninian, liliu konta ba iha parte mitigasaun no prevensaun nian”, dehan Komandante APC Manufahi ne’e.
Finalidade husi workshop ne’e, tuir Nivío Celestinho J. Batista mak oinsa atu hamenus risku ba dezastre nian. Perante partisipantes sira, reprezentante Administrador Munisípiu Manufahi Julio Godinho hato agradese ba serbisu hamutuk entre APC ho FAO, hodi realiza atividade workshop neebé importante tebes hodi fahe informasaun no koñesimentu ba ita atu ita iha preparasaun diak hodi hasoru dezastre sira.
” Lori Administrador Munisípiu nia naran agradese ba APC no Organizasaun Internasiionál FAO hodi realiza workshop kona-bá validasaun Relatóriu Avaliasaun Vulnerabilidade, Risku, Perigu no Plano Jestaun Risku Dezastre (AVRP-JRDBK). Dehan Julio Godinho. Nia hatutan tan ho workshop ne’e atu fahe informasaun ba ita hodi halo preparasaun di’ak wainhira hasoru dezastre sira.
Objetivu husi relatóriu Validasaun ne’e, “Primeiru, atu valida estudu ou rezultadu avaliasaun vulnerabilidade risku dezastre, tuir fali mak atu rona input ka avaliasaun husi partisipantes sira ba relatório KJDS preppara”, haktuir espesialista FAO, Lourenço Cosme Xavier.
Hodi motiva liutan serbisu KJDS sira nian ba iha komunidade, reprezentante DNGRD, Xefi Departamentu Finansas, Celestina de Brito Matos hateten membru KJDS iha ona koñesimentu di’ak tebes ba iha risku dezastre nian, nune’e sira mos bele ajuda APC iha prevensaun ba risku dezastre nian.
“DNGRD fo korajen ba iha estrutura KJDS nian no ita agradese tamba sira mós iha ona koñesimentu ba iha komisaun Jestaun Risku Dezastre suku nian nomós bele ajuda Autoridade protesaun sivíl tamba sira iha ona koñesimentu atu bele responde ba iha situasaun dezastre nian”, dehan Celestina de Brito.
Partisipa iha workshop ne’e, Reprezentante Administrador Manufahi, Komandante APC Manufahi, Adjunto APC Manufahi, DNGRD, Diretór sira no xefi departamento Munisípiu Manufahi nian, NGO Nasionál no internasionál hanesan WFP, FAO, CVTL no seluk tan.
Foto/Textu: Nato (GREC-APC)