𝐀𝐏𝐂 𝐄𝐍𝐓𝐑𝐄𝐆𝐀 𝐌𝐀𝐓𝐄𝐑𝐈𝐀́𝐋 REKOPERASAUN 𝐁𝐀 𝐔𝐌𝐀 𝐊𝐀𝐈𝐍 𝟏𝟏 𝐕𝐈́𝐓𝐈𝐌𝐀 𝐈𝐍𝐒𝐄́𝐍𝐃𝐈𝐔 𝐊𝐀𝐑𝐄𝐍𝐓𝐈𝐍𝐀 𝐓𝐀𝐒𝐈-𝐓𝐎𝐋𝐔

𝐃𝐢𝐥𝐢, 𝟏𝟓 D𝐞𝐳𝐞𝐦𝐛𝐫𝐮 𝟐𝟎𝟐𝟑- 𝐒𝐞𝐤𝐫𝐞𝐭𝐚́𝐫𝐢𝐮 𝐄𝐬𝐭𝐚𝐝𝐮 𝐏𝐫𝐨𝐭𝐞𝐬𝐚𝐮𝐧 𝐒𝐢𝐯𝐢𝐥, 𝐃𝐨𝐦𝐢𝐧𝐠𝐨𝐬 𝐌𝐚𝐫𝐢𝐚𝐧𝐨 𝐑𝐞𝐢𝐬, 𝐡𝐨 𝐏𝐫𝐞𝐳𝐢𝐝𝐞𝐧𝐭𝐞 𝐀𝐮𝐭𝐨𝐫𝐢𝐝𝐚𝐝𝐞 𝐏𝐫𝐨𝐭𝐞𝐬𝐚𝐮𝐧 𝐒𝐢𝐯𝐢́𝐥, 𝐒𝐮𝐩𝐞𝐫𝐢𝐧𝐭𝐞𝐧𝐝𝐞𝐧𝐭𝐞 𝐏𝐍𝐓𝐋, 𝐈𝐬𝐦𝐚𝐞𝐥 𝐝𝐚 𝐂𝐨𝐬𝐭𝐚 𝐁𝐚𝐛𝐨 𝐬𝐞𝐱𝐭𝐚 𝐟𝐞𝐢𝐫𝐚 𝐧𝐞’𝐞 𝐞𝐧𝐭𝐫𝐞𝐠𝐚 𝐦𝐚𝐭𝐞𝐫𝐢𝐚́𝐥 𝐫𝐞𝐤𝐨𝐩𝐞𝐫𝐚𝐬𝐚𝐮𝐧 𝐡𝐨 𝐨𝐫𝐬𝐚𝐦𝐞𝐧𝐭𝐮 𝐦𝐚̃𝐨 𝐝𝐞 𝐨𝐛𝐫𝐚 𝐛𝐚 𝐮𝐦𝐚 𝐤𝐚𝐢𝐧 𝟏𝟏 𝐯𝐢́𝐭𝐢𝐦𝐚 𝐢𝐧𝐬𝐞́𝐧𝐝𝐢𝐮 𝐊𝐚𝐫an𝐭𝐢𝐧𝐚, 𝐓𝐚𝐬𝐢𝐭𝐨𝐥𝐮 𝐡𝐨𝐝𝐢 𝐡𝐚𝐫𝐢’𝐢 𝐟𝐚𝐥𝐢 𝐬𝐢𝐫𝐚-𝐧𝐢𝐚 𝐮𝐦𝐚 𝐟𝐨𝐮𝐧.

Hafoin simu materiál konstrusaun ho orsamentu mão de obra, Autoridade Protesaun Sivil (APC) liuhusi Komandante APC munisipiu Dili ho ekipa reintegra kedas uma kain 11 ba sira-nia munisípiu orijén, uma kain 6 desloka ba munisípiu Ermera, uma kain 3 ba munisípiu Bobonaro, uma kain ida ba RAEOA no uma kain ida iha suku Dare, munisípiu Dili.

Sekretáriu Estadu Protesaun Sivil, Domingos Mariano Reis husu ba uma kain 11, ne’ebé simu ona materiál hosi governu tenke hari’i uma, labele faan ba seluk, se faan mak sei kondena ho lei.

“Ha’u husu ba vítima sira simu ona materiál tenke harii ona uma, atu hetan direitu hela iha fatin dignu hanesan mos sidadaun sira seluk, ita-boot sira hanesan sidadaun Timor iha direitu atu rekopera hela fatin, no hetan apoiu emerjénsia no rekoprasaun kuandu hetan dezastre naturais,” esplika SEPS.

Sekretáriu Estadu fundamenta “Nuno governu konstitusionál ne’ebé lidera hosi Maun Boot Kayrala Xanana Gusmão nafatin fo soliedaridade ba ita-boot sira, maibé ita-boot sira mós tenke hari’i ona uma, labele hein, labele husik hela, labele fó empresta kalen ba ema seluk, labele faan sasan sira ne’e, maibé uza hari’i uma hodi proteje ita-boot sira hosi udan ben no loron manas.”

Governante esplika apoiu rekoprasaun kompostu hosi pregu, semente, besi, arame, kalen, besi kotak, balde ho materiál pakote kompletu ba uma ida nian, ho osan montante 1.000 tuir lei númeru 7/2020, osan ne’e uza item rua, ida ba mão de obra no ida ba kustu transporte, ho apoiu hahan ba kada família 50 kilo.

Membru governu haktuir iha semana kotuk nia parte hasoru malu ona vítima sira hodi ko’alia no parte vítima sira konkorda ho governu nia apoiu, tuir dekrétu lei númeru 7/2020 sidadaun ida afeita kauza hosi dezastre iha direitu ba apoiu emerjénsia, rekoperasaun no orsamentu mão de obra, ho ida ne’e iha semana ne’e vítima sira deside fila ba sira-nia hela fatin.

Entretantu, inséndiu Tasitolu akontese iha loron 26 fevereiru 2023, família uma kain 50 mak afeita, enkuantu uma kain 30 resin evakua ba kobe house iha Palásiu Prezidensiál Aitarak-Laran, uma kain 11 ba Tasitolu, Karentina.

Foto/Textu : Cipry (GREC-APC)