Indonézia, 08 Dezembru 2023-Funsionãriu Autoridade Protesaun Sivíl (APC) hamutuk 20 simu sertifikadu hosi parte sentru formasaun Smile Group Jogjakarta hafoin konklui no kompleta formasaun durante semana 2, hahú hosi 27 novembru to’o 08 dezembru 2023.
Serimónia enseramentu formasaun ofisialmente taka hosi Xefe Gabinete Sekretáriu Estadu Protesaun Sivíl (SEPS), Adelino da Costa Soares akompana hosi ekipa tékniku APC, Diretór DNGR, Virgilio dos Santos Soares ho Xefe Seksaun GPEA, Paulo Exposto.
Xefe Gabinete SEPS, Adelino da Costa Soares lori governu liuhusi SEPS hato’o agradese ba Smile Group ne’ebé kapasita ona funsionáriu APC.
“Hakarak hatoo obrigadu barak ba Smile Group, ne’ebé fasilita ona treinamentu ba funsionáriu APC durante loron 10 iha Yogyakarta,” Xefe Gabinete.
Xefe Adelino esklarese formasaun sira hanesan sei kontinua, maibé hala’o fali iha fatin seluk.
Liga ba formasaun loron 10, Nia konsidera seidauk másimu no efetivu, tanba persija kontinua nafatin formasaun iha área oioin hodi inklui mós funsionáriu Gabinete SEPS nian.
Iha fatin hanesan, Diretór DNGR, Virgilio dos Santos Soares fó agrdese ba Smile Group ne’ebé kapasita ona funsionariu APC nian ho atendeimentu ne’ebé di’ak to’o ninia finalidade. Tanba koperasaun servisu hamutuk sei iha ninia kontinuadade hodi dezenvolve rekursu umanu APC nian ba oin.
Enkuantu, Diretór Operasaionál Smile Group, Sullamul Huda, SS hateten sente kontente bele hetan fiar hosi governu liuhusi SEPS-APC hod fó treinamentu ba funsionáriu iha Timor-Leste.
Nia hatutan koperasaun servisu hamutuk ba treinamentu la’o di’ak tebes tanba ne’e husu ba funsionáriu sira tenke implementa siénsia ne’ebé hetan iha ida-idak ninia servisu fatin, nune’e bele iha ninia benefísiu ba instituisaun.
Iha biban ne’e, Reprezentante hosi funsionária APC, Bangracia Pires nuudar formanda hateten sente orgullu no kontente tebes loron 10 iha formasaun bele hetan siensia no skill hosi formador Prof. Doutro sira iha area oioin no pakote, la’os ida deit.
“Ha’u nia servisu iha finansas maibe iha formasaun ne’e ha’u bele aprende pakote hanesan ezempu aprende mos lojistika, planeamentu, auditoria interna no aprovizionamentu” haktuir Formanda.
Reprezentante Formandu APC hatoo mos obrigado ba Smile Group ninia atendementu husi inisiu to’o rohan ne’ebe di’ak tebes.
Programa formasaun foku liubá área 9 hanesan akuntabililidade orsamentu, auditória interna bázika ba orsamentu, administrasaun modernu liga ba microsoft excel, operadór kamera drone, estatístika baze dadus, jestaun rekursu umanu, jestaun planeamentu orsamentu no programa, média komunikasaun visuál, jestaun lojístika.
Fontes informasaun APC