Dili, 05 Dezembro 2023 – iha Tersa-Feira Semana ne’e, Prezidente Autoridade Protesaun Sivíl akompaña Ministro Interior no Sekretáriu Estadu Protesaun Sivíl hamutuk diretores APC nian halo audiénsia públika ho Komisaun Espesializada Permanente Komisaun B Parlamentu Nasionál ne’ebe trata asuntu Negosiu Estranjeiru, Kooperasaun, Defeza no Seguransa, hodi aprezenta Orsamentu Jerál Estadu tinan fiskál 2024 nian ne’ebe prejidi hosi Prezidente Komisaun B Parlamentu Nasional Domingos Augusto ”’Deker. Enkontru ne’e halao iha Sala enkontru GMPTL Komisaun B, Parlamentu Nasionál.
Iha oportunidade ne’e, prezidente Autoridade Protesaun Sivíl, Superintendente Polisia Ismael da Costa Babo aprezenta mós gastus orsamento ba tinan 2023 ne’e, atinji ona 83% enkuantu falta 17% mak seidauk ezekuta tamba sei rezerva hela ba iha formasaun ba rekursus Umanus no salário fulan dezembru nian. Alén de aprezenta ezekusaun orsamentu iha 2023 nian, Prezidente Autoridade Protesaun Sivíl mós aprezenta planu atividade no orsamento ba 2024 nian.
Partisipa iha audiénsia ne’e, Ministro Interior, Sekretáriu Estadu Protesaun Sivíl, Prezidente Autoridade Protesaun Sivíl, Diretór DNGRD, Diretór GPEA, Diretór Sentru Formasaun, Komandante Unidade Espesiál. Entre tantu Komisaun B partisipa husi xefi Bancada hamutuk ho kompozisaun estrutura Komisaun B nian.
Foto/Textu: Nato (GREC-APC)