Dili, 14 dezembru 2023- Prezidente Autoridade Protesaun Sivíl (APC), Superintendente PNTL, Ismael da Costa Babo hamutuk ho Komandante Operasaun Nasional APC Superintendente Asistente PNTL, Nuno Romualdo Gomes reuniaun ho diretór foun no sesante sira iha edifísiu APC Kaikoli, kinta-feira ne’e.
Objetivu reuniaun ko’alia kona-ba ezekuta ordém Ministru Interior nian kona-ba mudansa estrutura, no halo preparasaun ba iha dezastre nian tamba situasaun agora udan maka’as, ikus liu ordem ida atu enkontru iha Maubara.
Prezidente APC, Superintendente PNTL, Ismael da Costa Babo hateten funsionáriu prontu iha kualker momentu ezekuta tuir ordém husi funsaun públiku, tamba na’in funsionáriu hotu nia na’in mak funsaun públiku.
Nia haktuir “desizaun mais alto mai husi Exelénsia Ministeriu Interior ho Sekretáriu Estadu Protesaun Sivíl foti ita irarkiamente ezekuta. Tanba kargu xefia sira hetan konfiansa, la’os ita-nia nível, la’os ita-nia professional. Tanba ne’e husu ba ita hotu tau espíritu unidade no espíritu servidór ba estadu, ita-nia objetivu mak servi ba ita-nia povu rai doben Timor-Leste.”
Primeiru Lideransa APC husu ba diretór sesante apoiu nafatin ho diretór foun atu koordena servisu hamutuk hodi lori APC ba oin, tanba Timor ne’e presiza ema hotu nia servisu.
Foto/Textu: Bety (GREC-APC)