Dili, 05 Dezembru 2023 – Autoridade Protesaun Sivíl iha Tersa-Feira Semana ne’e simu vizita husi delegasaun BNPB Indonézia Lideradu husi Sekretáriu Prinsipál BNPB, Rustian, S.Si., Apt., M.Kes. Delegasaun BNPB Indonézia ne’e, simu direitamente husi S.E. Sekretáriu Estadu Protesaun Sivíl, Domingos Mariano Reis ho Prezidente Autoridade Protesaun Sivíl, Superintendenti Polísia Ismael da Costa Babo, iha edefísiu APC Kaikoli Dili.
Objetivu husi enkontru bilateral ne’e, parte rua koalia liu kona-bá kooperasaun Autoridade Protesaun Sivíl ho BNPB iha parte kapasitasaun ba rekursus Umanus APC nian iha futuro.
“Objetivu ohin atu fortalese kooperasaun bilateral Timor-Leste ho Indonesia kona-bá protesaun Sivíl maibe espesífiku ba jestaun dezastre nian”, dehan Domingos Mariano Reis.
Governante ne’e realsa liutan katak, fortalesimentu kooperasaun parte rua liuhusi proposta APC nian ba BNPB Indonézia iha parte tolu hanesan kapasitasaun iha parte terrestre, Marítima no Aero nian.
Hatan ba proposta ne’e, Sekretáriu Prinsipál BNPB Indonézia Rustian, S.Si., Apt., M.Kes. hateten Indonézia konkorda atu nasaun rua ne’e servisu hamutuk hodi troka hanoin kona-bá prevensaun dezastre nian liuhusi kapasitasaun ba Rekursus Umanus.
“Ami lori Governu Repúblika Indonézia halo ona kooperasaun ho Timor-Leste, espesífiku liu iha prevensaun dezastre nian, nune’e nasaun rua indonézia ho Timor-Leste nudar maualin, signifika iha prevensaun dezastre nian nasaun rua konkorda, primeiru troka hanoin konaba antendimentu ba dezastre nian husi reprezentante Timor-Leste nian no mós Indonézia nian”, haktuir Sekretáriu Prinsipál BNPB Indonézia ne’e.
Rustian,S.Si.,Apt.,M.Kes., aumenta tan, além troka hanoin hamutuk, kapasitasaun ba rekursus Umanus nian mos importante atu parte rua sei hare hamutuk ba kooperasaun parte rua diak liutan iha futuru. Tamba tuir, Sekretáriu Prinsipál BNPB Indonézia ne’e katak Indonézia ativu teb-tebes iha nível internasionál liga ho dezastre ne’e no sempre apoio nasaun vijiñu sira ne’e afetadu ba dezastre liuhusi materiais no rekursus Umanus nian.
Partisipa iha enkontru bilaterál ne’e, Sekretáriu Estadu Protesaun Sivíl, Prezidente Autoridade Protesaun Sivíl, Diretór DNGRD, Diretór Marítima, Diretór Sentru Formasaun, Komandande Unidade Espesiál no Diretór GREC, enkuantu husi Delegasaun BNPB indonézia lideradu husi sekretáriu Prinsipál Rustian,S.Si.,Apt.,M.Kes., no iha enkontru ne’e mós hetan observa husi ekipa MNEC.
Foto/Textu: Nato & Bety (GREC-APC)