Dili,04 Janeiru 2024-Hafoin hetan mudansa ba estrutura kargu diresaun iha Autoridade Proteção Civíl (APC), ho nune’e Adjuntu Operasaun Marítima sesante, Serafim da Costa ofisialmente entrega serbisu ba Cosme Camilo, ne’ebé nomeadu nuudar Adjuntu Operasaun Marítima foun iha APC.
Atividade termu entrega asiste direita hosi Komandante Operasaun Nasional APC, Superintendente Asistente PNTL, Nuno Romualdo Gomes iha sala Sentru Nasional Operasoes Protesaun Sivíl Kaikoli, kinta feira ne’e.
Iha okaziaun ne’e, Adjuntu Operasaun Marítima Sesante, Serafim da Costa hatoo ninia sentidu agradesimentu profundu ba lideransa APC nian, ne’ebé fó ona konfiansa hodi asume kna’ar nu’udar Adjunto Operasaun Marítima iha APC.
“Agradese no obrigada barak ba iha Prezidente APC no Komandante Operasaun Nasional, tamba bele fó konfiansa no tempu mai ha’u hanesan Adjuntu Operasional Marítima iha Sentru Nasional Operasoes Protesaun Sivíl. Agradese ba Adjuntu Aero ho Terestre, ne’ebé serbisu hamutuk bazeia ba despaixu no orientasaun husi Komandante ami nain tolu sempre serbisu hamutuk,” hateten Adjunto Sesante.
Nia esplika serbisu área marítima hanesan serbisu foun ida durante iha APC bazeia ba artigu númeru 3, kapítulu 2 lei orgánika APC tuir kompeténsia serbisu lubuk ida no kna’ar balun konsege hala’o bazeia ba kompeténsia no planu APC nian.
Adjunto Sesante hatete “durante tinan ida hanesan Adjuntu Marítima halo ona kordenasaun serbisu ho liñas ministeriais, Polisia Marítima, forsa Naval ka komponente naval F-FDTL hodi halo preparasaun ba dezastre bainhira akontese iha área marítima nian, nomós ezersisiu konjuntu.”
Iha fatin hanesan, Adjuntu Operasaun Marítima foun, Cosme Camilo konsidera servisu iha área marítima hanesan servisu foun, maibé buka atu servisu hamutuk ho ekipa.
“Serbisu hotu, ne’ebé ha’u hasoru hanesan supresa ida, ho nune’e mak serbisu área marítima hanesan serbisu foun ida, maibé nia nafatin serbisu hamutuk ho komandante, adjuntu sesante no ekipa seluk nune’e atu apoiu malu hodi la’o ba oin liu-liu iha area maritima nian, hateten Adjunto Foun.
Komandante Operasaun Nasional APC, Superientendente Asistente PNTL, Nuno Romualdo Gomes mós hateten mudansa ba kargu no termu entrega servisu desizaun orgaun soberania no Komisaun Funsaun Públika.
“Ita ofisializa termu entrega, tanba desizaun órgaun soberánia nian liuhusi Komisaun Funsaun Públiku hanesan funsionáriu, ne’ebé di’ak no sidadaun ne’ebé di’ak ita tenki kumpri kualkér desizaun hotu ne’ebé ita-nia órgaun soberánia sira fó mai ita” hateten Komandante.
Segundu Lideransa APC husu ba adjuntu sesante atu serbisu hodi apoiu nafatin adjuntu foun, atu nune’e serbisu bele sai di’ak liu, atu koordena malu iha serbisu hotu liuliu iha area marítima nian.
Partisipa iha entrega termu serbisu ne’e akompaña mós Adjuntu Operasaun Areo, Adjunto Operasaun Terestre ho funsionáriu Sentru Nasional Operasoes Protesaun Sivíl.
Foto/Textu: Bety (GREC-APC)