Dili, 13 janeiru 2024-Autoridade Proteção Civil (APC) liuhusi Korpu Bombeiros hamutuk ho ekipa Jestaun Merkadu munisípiu Dili iha sábadu ne’e kontinua halo lavajen no suru rai ne’ebé monu hodi taka dalan iha areadór Kristu Rei nian.
Atividade lavajen hetan orientasaun hosi Sua Exelénsia Ministru Interior, Francisco Guterres.
Asaun ba lavajen hala’o relasiona ho udan ho intensidade boot, ne’ebé akontese iha loron 09 janéiru 2024, provoka inundasaun no rai halai hodi taka dalan sira iha parte Kristu Rei nian.
Enkuantu, ho esforsu Bombeiros hodi halo lavajen ba rai, foer no tesi ai maran sira iha parte Kristu Rei nuudar asaun ida hodi garante ambiente moos no saudavel, ho nune’e públiku bele halo movimentu iha Kristu Rei.
Entretantu, hola parte iha lavajen kompostu hosi Komandante Operasaun Nasional APC, Superintendente Asistente PNTL, Nuno Romualdo Gomes, Diretór Nasionál Jestaun Rekursu, Virgilio dos Santos Soares, Diretór Nasional Bombeiros, Paulo Anibal Maia, Komandante Operasaun APC munisipiu Dili, Inspetór PNTL, Jose Antonio Barata, Adjunto Operasaun Aero, Mariano Ana Lopes, Adjunto Operasaun Terestre, Martinho Fatima no Adjunto Maritima, Cosme Camilo da Costa.
Foto/Textu: Cipry & Mateus (GREC-APC)