Dili, 12 Janeiru 2024- Prezidenti Autoridade Proteção Civíl (APC), Superientendente Polisia Ismael da Costa Babo enkontru ho operador Telekomunikasaun hanesan, Timor Telekom (TT), Telekomsel, no Telemor iha edifisu APC Kaikoli sexta- feira ne’e.
Objetivu husi enkontru ne’e atu halibur ideias no hanoin ruma husi rede operador telekomunikasaun tolu hanesan Timor Telekom, Telemor, no Telekomsel nia kontribuisaun hodi fasilita mensajén alerta ho gratuitu ba klientes hotu liga ba iha situasaun dezastre naturais.
Governu liuhusi Autoridade Protesaun Sivíl husu nafatin ba operador tolu ne’e nia kontribuisaun ba iha ita bo’ot sira nia klientes rasik no ba povu Timor-Leste nia moris liuhusi mensajén alerta gratuitu relasiona ho dezastre naturais ne’ebé mak atu hato’o ba klientes hotu iha Timor.
Prezidente APC hateten, Bainhira mensajén sai husi parte APC ba iha operador tolu ne’e sei espalla ba sidadaun hotu ho mensajén gratuitu, tamba ho limitasaun balún ita promove espíritu solidariedade no umanu. Nune’e APC husu ita bo’ot sira nia tulun atu fó mensajén alerta gratuitu ba públiku iha situasaun dezastre naturais atu bele salva ita nia sidadaun sira husi fatin risku ba iha fatin seguru.
Iha tempu tuir mai parte APC sei tenta halo MoU atu públiku katak, MoU ne’e oferese gratuitu husi operador telekomunikasaun sira ba espíritu solidariedade no umanista ba nia klientes hotu no ba sidadaun hotu. Rede operador tolu ne’e sei servisu no apoiu nafatin ho Autoridade Protesaun Sivíl iha situasaun hotu.
Partisipa iha enkontru ne’e, Prezidente APC, Superientendente Poliçia Ismael da Costa Babo, Adjuntu Terrestre Martinho Fátima, Adjuntu AERO Mariano Ana Lopes, Diretór GREC, Cesario da Silva Marques,Diretór sesante DNGRD Agustinho Cosme Belo no Operador tolu hanesan, Timor Telekom, Telemor no Telkomsel.
Foto/Terxtu: Bethy(GREC-APC)