Dili, 15 Janeiru 2024-Autoridade Proteção Civíl (APC), liuhusi Diretór Gabinete Relasaun Externa no Komunikasaun (GREC), Cesario da Silva Marques, relata dadus akontesimentu iha semana ida nian ba Publiku, APC rejistu uma hamutuk ne’ebe maka hetan desastre Xefi famílias 432 no ema 2 lakon vida, ne’ebé rekolla husi Munisipiu sira iha territóriu nasionál. Lia hirak ne’e, relata husi Portoz APC liuhusi konferénsia imprensa ne’ebé hala’o iha salaun konferénsia APC Kaikoli Dili Segunda-Feira semana ne’e.
“Atualizasaun dadus ba semana ida, hahú iha loron 09 to 15 Janeiru 2024 durante Semana ida ne’e, iha rejiaun Timor-Leste normal no akontese tipu dezastre maka CNOPC-APC rejistu uma hamutuk Xefi famílias 432 mak hetan estragus liu-liu iha Munisipiu sira hanesan tuir mai ne’e : Munisipiu Ainaro (Be’e sae estragus uma 1, ema kanek 8 no mate 1), Atauro (Anin sobu uma 1), Bobonaro (Anin sobu uma 7), Munisipiu Covalima (Anin sobu uma 1, Be’e Sae 4), Municipiu Dili (Ahi han 1, Be’e sae 386), Ermera (Anin sobu uma 1, Inundasaun uma 2, mate 1), Munisipiu Liquiça (Anin Sobu uma 4, be’e sae estragus uma 17), Municipiu Manatuto (Anin sobu Uma 1), Municipiu Manufahi (anin sobu uma 1), RAEOA (Ahi Han Uma 1), Municipiu Viqueque (Anin Sobu Uma 4)”, haktuir Diretór GREC-APC. Tuir Cesario da Silva Marques, semana ne’e dadus husi inundasaun mak as liu kompara ho semana hirak liubá.
Porta-Voz APC ne’e esklarese liután katak, “Ba apoiu emerjénsia Munisípiu 10 komandu Autoridade Protesaun Sivíl ho parseiros sira apoio ona assinténsia emerjénsia ba iha vítima sira”. Nia hatutan tan katak ba Munisípio Dili seidauk hetan apoio emerjénsia ho razaun katak ekipa APC sei hare hamutuk ba dadus final hodi bele resposta ba iha familia vítima sira liga ho inundasaun foin lalais ne’e, bazeia ba tipo dezastre ne’ebé kategoria tuir lei protesaun sivíl.
Husi akontesimentu inundasaun ne’ebé foin akontese iha semana kotuk nian, APC liuhusi Bombeiros kontinua halo lavajem ba estrada públiku sira e inklui tesi ai sira ne’ebé fo ameasa ba movimentu transporte públiku nian.
Liuhusi Monitorizasaun, ne’ebé mai husi Sentru Nasional Operasaun Sivíl (CNOPC-APC), Porta-Voz APC ne’e, kontinua alerta nafatin ba komunidade sira atu hadok an husi fatin ne’ebé konsidera risku ba dezastre wainhira udan ho intensidade makas, anin bot no rai nakdoko. Wanhira uda mai makas liu husi orás di’ak buka evakua lalais ba fatin seguru no gurada dokumentus importante sira iha fatin ne’ebé as.
Foto/Textu: Cipry & Nato (GREC-APC)