Dili, 17 Janeiru 2024- Prezidenti Autoridade Proteção Civil (APC), Superintendente PNTL, Ismael da Costa Babo konvoka reuniaun kordenasaun estrutura nivel Altu APC nasionál, rejionál no munisípiu hodi avalia no aprezenta progresu servisu no dezáfiu sira ne’ebé APC enfrenta iha tinan 2023.
Sorumutu ofisialmente loke hosi Prezidente APC, Superintendente PNTL, Ismael da Costa Babo akompaña hosi Komandante Operasaun Nasionál APC, Superintendente Asistente PNTL, Nuno Romualdo Gomes, inklui Xefi Gabinete SEPC Adelino Soares iha salaun APC Kaikoli.
Reuniaun nivel altu APC envolve Diretór Gabinete, Diretór Nasionál, Komandante Operasaun APC, Komandante Sentru Formasaun, Komandante Unidade Espesiál, Adjunto, Komandante Bombeiros, Xefe Departamentu no Xefe Sekasaun sira.
Prezidente APC hateten reuniaun kordenasaun atu haree progresu servisu no dezáfiu sira, ne’ebé halo ona iha tinan kotuk sai referénsia hodi halo estudu klean ho situasaun agora atu hamosu opiniaun, sujestaun, prioriedade no planu ba susesu iha tinan 2024 nian.
Primeiru Lideransa APC afirma bainhira instituisaun APC la’o ho di’ak, kabe ba responsabilidade ema hotu nian hahú husi autoridade to’o estrutura sira hotu.
“Instituisaun ne’e atu lao di’ak iha ita hotu ninia responsabilidade, hahú husi ita-nia Na’i ulun sira responsavél polítika nian hanesan Ministru no Sekretáriu Estadu, mai to’o ita sira tékniku hanesan Prezidente Autoridade to’o Ita-Boot sira,” hateten Prezidenti APC.
Direjente Máximu APC fundamenta responsabilidade ema hotu ninia objetivu ida mak atu salva sidadaun nia vida, patrimóniu ho ambiente. Tanba ne’e Protesaun Sivíl reafirma servisu tomak iha lei ne’ebé mak fó tiha ona.
Nia hateten “Ita orgullu, iha tinan barak ita laiha Lei Protesaun Sivíl, iha 2010 kuandu Lei seguransa nasionál aprova, iha momentu Lei defeza no seguransa interna mós aprova kedas. Depois tinan 10 mak Lei Protesaun Sivíl aprova ho tempu badak, maibé ita konsege, ne’e hatudu katak ita hotu ninia intensaun diak dudu lalais ita-nia nasaun ne’e. Ita-nia Lei Protesaun Sivíl kompleta sistema seguransa nasionál no lei orgánika mós iha ona bele kompleta liutan ita-nia servisu hodi tau prioridade ba Ita-nia réjime espesiál ho sira seluk tan.”
Ikus liu, Prezidenti APC rekoñese dezáfiu oioin, ne’ebé APC hasoru iha terenu sai referénsia hodi halo diágnostiku ho realidade atuál hodi hateke ba oin.Tanba susesu mai hosi ema hotu ninia dedikasaun, kontribuisaun koletivu atu APC bele di’ak hanesan terseiru pilár iha sistema seguransa nasionál iha Timor-Leste, hatudu katak Protesaun Sivíl mós prontu atu hasoru ameasa saida de’it hanesan funu iha nasaun Ukraina no Rusia, Israel ho Palestina nian, Protesaun Sivíl sempre prontu fó protesaun ba ema hotu.
Foto/Textu: Cipry, Bethy, Nato (GREC-APC)