𝗔𝗣𝗖 𝗙𝗢𝗥𝗡𝗘𝗦𝗘 𝗣𝗔𝗞𝗢𝗧𝗘 𝗛𝗔𝗛𝗔𝗡 𝗛𝗢 𝗟𝗔’𝗢𝗦 𝗛𝗔𝗛𝗔𝗡 𝗕𝗔 𝗩𝗜́𝗧𝗜𝗠𝗔 𝗜𝗡𝗦𝗘́𝗡𝗗𝗜𝗨 𝗞𝗔𝗥𝗘𝗡𝗧𝗜𝗡𝗔

Dili, 24 Janeiru 2024-Autoridade Proteção Civil (APC) fornese pakote emerjénsia kategória hahan ho la’os hahan ba xefe família 38, ne’ebé vítima inséndiu karentina Tasitolu daudaun evakua provizóriu iha Kobe House, Pálasiu Prezidensiál, Aitarak laran.

Enkuantu, pakote emerjénsia simbolikamente entrega hosi Sua Exelénsia, Sekretáriu Estadu Protesaun Sivíl, Domingos Mariano Reis ba vítima sira, molok reintegra ba sira-nia hela fatin orijén.

Iha okaziaun ne’e, Sekretáriu Estadu Protesaun Sivíl (SEPC) hateten vítima sira ne’e mai hosi inséndiu karentina Tasi-Tolu governu liuhusi Protesaun Sivíl fó pakote emerjénsia aihan no la’os aihan ba vítima sira hodi tulun durante konstroi sira-nia uma.

Governante ne’e esplika kona-ba rekoperasaun no konstrusaun ba vítima sira-nia uma sei responsabiliza hosi Ministério Administrasaun Estatal (MAE), ne’ebé deside ona iha Konsellu Ministru.

“Hanesan ita hotu hatene, vítima inséndiu Tasi-Tolu iha tinan kotuk fahe ba grupo rua. Grupo ida iha areadór Palásiu Prezidensiál no grupu ida seluk iha sentru evakuasaun Covid-19 Tasi Tolu. Liuhusi enkontru Konsellu Ministru deside Protesaun Sivíl mak responsabiliza ba xefi família hamutuk 11 iha Tasi-Tolu, ne’ebé evakua hotu ona ba sira nia hela fatin no konstroi ona sira nia uma, enkuantu vítima iha Palásiu Prezidensiál responsabiliza hosi MAE ba materiál konstrusaun ho rekoperasaun ,” esplika SEPC.

Iha fatin hanesan, família vítima, Estela Soares husi Aldeia Terra Santa, Suku Madohi hateten “Hau sente orgullu ho Protesaun Sivíl, ha’u sente kontente no agradese ba Protesaun Sivíl no Estatal bele apoiu netik ami”.

Pakote distribuisaun food item hanesan fós, mina, supermi, kafé ut, masin midar, masin moruk, latarias/ sardines, biskuit, aqua (foof Iotem). Enkuantu laos hahan (non Food Item) sanan, tasu, kanuru, bikan, lona, manta no seluk tan.

Partisipa iha distribuisaun inklui Komandante APC Munisípiu Dili, Inspetór Polísia, José António Barata da Silva, Diretór DNGRD Francisco Fátima da Cruz, Adjunto Terrestre, Martinho Fátima, Adjunta Kaza Sivíl Prezidénsia Repúblika no ekipa MAE.

Entretantu, inséndiu karentina Tasi Tolu, suku Madohi akontese iha loron 24 fevereiru 2023 tinan kotuk, no hahú semana ida ne’e laran ekipa MAE sei reintegra ba sira-nia hela fatin.

F/T: Cipry & Nato (GREC-APC)