Dili, 29 Janeiru 2024- Autoridade Proteção Civil (APC) liuhusi Komandu APC munisípiu Dili organiza treinamentu ba lideránsa komunitária no Administradór Postu sira iha munisípiu Dili kona-ba sistema alerta sedu oinsá atu responde ba dezastre naturais.
Programa treinamentu ne’e fasilita hosi APC, UNDP ho DNMG durante loron 2, hahú 29-30 iha salaun APC Kaikoli Dili, ho objetivu atu hasa’e koñesimentu lideransa komunitária sira-nia iha prevensaun dezastre.
Komandante APC munisipíu Dili, Inspetór PNTL, José António Barata da Silva hateten formasaun ne’e atu partilla informasaun ba malu iha prosesu verifikasaun ba asuntu dezastre no oinsa perevene persiza kolaborasaun hodi tau atensaun iha tempu uda no anin boot.
Komandante fundamenta xefe suku presiza rona informasaun sira ne’e hodi partilla ba komunidade sira hotu, wainhira la partisipa no la rona mosu dezastre ruma mosu foin hatene kona-bá lala’ok mosu dezastre.
Iha okaziaun ne’e, Administadór Postu, Vera Cruz Manuel Gusmão reprezenta Prezidenti Autoridade Munisipíu Dili husu membru konsellu suku sira atu foku no fó atensaun di’ak ba treinamentu asuntu dezastre, parte ida atu kontribui halo prevensaun no redusaun risku dezastre iha tempu udan.
“Ita hatene agora iha tempu udan maka’as dezastre mosu iha fatin hotu, entaun ho fó formasaun ida ne’e ita kontinua hatutan informasaun ba maluk sira seluk, liuliu xefe suku sira atu alerta ba komunidade sira hodi prevene no redús dezastre naturais, ne’ebé akontese iha tempu udan liu-liu área ne’ebé risku ba dezastre,” esplika Administradór Postu Vera Cruz.
Autoridade Lokál hateten “APC munisipíu Dili fasilita formasaun ba membru konsellu suku atu bele hatene kona-bá dezastre, liafuan dezastre ita hotu hatene no rona maibé ita nia prátika mak menus, husu nafatin ba ita bo’ot sira durante loron rua ne’e aproveita didi’ak iha treinamentu ida ne’e.”
Formasaun fasilita hosi parte APC kona-bá Konseitu Báziku Dezastre, perfil multi risku iha TL, introdusaun sistema BDDTL, prátika no análiza dadus risku dezastre-BDDTL, feramentes avalisaun estragus, UNDP foku liubá avalisaun risku multi perigu no vulneravilidade , DNMG aprezenta kona-bá Impact of Climate Hazards and Climate Change in TL.
Entretantu, partisipantes kompostu husi membru konsellu suku sira hosi suku Motael, Kolmera, Vila Verde, Kaikoli, Mascarenhas, Lahane Osidental no Dare, inklui Administradór Postu Vera Cruz, Dom Aleixo, Kristu Rei, no Nain Feto.
Foto/Textu: Cipry & Bety (GREC-APC)