Dili, 30 Janeiru 2024-Prezidenti Autoridade Proteção Civil (APC), Superintendente Polísia Ismael da Costa simu delegasaun hosi Word Bank Group tersa feira ne’e iha salaun APC, Kaikoli.
Ho prezensa parte, Work Bank Group mai iha APC atu ko’alia asuntu importante balun ligadu ho jestaun risku dezastre, resilénsia urbanu, avaliasaun risku périgu, no proposta investimentu diagnóstika resilénsia urbanu ba munisípiu Dili, aprezenta rezultadu no rekomendasaun husi rezilénsia dezastre nian no avaliasaun responsivu ba jestaun públika.
Prezidente APC, Superintendente Polísia, Ismael da Costa hateten “hare’e prinsípiu importante balun ita presiza tau atensaun ba iha risku dezastre hodi promove protesaun umanu no rikusoin ne’ebé Timor-Leste iha. Alende ida ne’e Timor-Leste mós hola parte no hetan tulun husi komunidade internasional sira ne’ebé signifikante tebes.”
Iha biban ne’e, Direjente másimu APC mós introdús ezisténsia, estrutura, no lala’ok servisu APC nian atendementu situasaun emerjénsia no dezastre naturais.
Iha fatin hanesan Senior Disaster Risk Management Specialist Jian Vun hateten servisu iha jestaun risku dezastre asuntu ne’ebé importante, tanba ne’e liga ho lejislasaun APC iha ona hakarak enkoraja APC atu kontinua programa ne’ebé eziste ona.
Hafoin konklui sorumutu ekipa hosi World Bank halo kedas vizita ba Sentru Operasaun APC hodi haree funsionamentu no sistema ba rai nakdoko, tsunami no dezastre sira seluk.
Entretantu, ekipa APC ne’ebé partisipa iha sorumutu ne’e kompostu hosi Komandante Operasaun Nasional APC, Superintendente Asisitente PNTL, Nuno Romualdo Gomes, Diretór GREK, Cesario da Silva Marques, Diretór DNGR, Virgilio dos Santos Soares, Adjunto Operasaun Áero, Mariano Ana Lopes, no Adjunto Operasaun Marítima, Cosme Camilo.
Foto/Textu: Bety (GREC)