Dili, 29 Janeiru 2024-Prezidente Autoridade Proteção Civil (APC), Superintendente Polísia Ismael da Costa Babo, akompaña husi Komandante Operasaun Nasionál APC, Superintendente asistente Polísia, Nuno Romualdo Gomes, iha Segunda-Feira ne’e atende enkontru ho ekipa (RCRCCC) iha salaun APC Kaikoli.
Ekipa Red Cross kompostu hosi Advisor Finansa Climate Center nian, Florence Picho akompaña husi Technical Adviser, Red Cross Red Crescent Climate Centre, Agustinho dos Reis de Fátima.
Liuhusi sorumutu ne’e, ekipa Red Cross Red Crescent Climate Centre hakarak rona oinsa APC nia servisu, prosesu no dezáfiu sira, ne’ebé hasoru durante responde ba situasaun dezastre, atu nunee ba futuru haforsa servisu hamutuk APC ho parseiru dezenvolvimentu sira iha route Map ida nudar matadalan ba responde emerjénsia sira.
Durante enkontru, Prezidente APC, Superintendente Polisia Ismael da Costa Babo, introdús estrutura APC nian, servisu, prosesu no dezafiu sira ba ekipa Red Cross Red Crescent Climate Centre.
“APC lidera husi Prezidente, tuir Komandante Operasionál hamutuk ho Gabinete tolu, Komandu APC Munisípiu 13 nomós RAEOA, inklui dirasaun DNGRD, DNGR, Sentru Formasaun no DNB, ne’ebé tutela Ministériu Interior, Sekretária Estadu Protesaun Sivíl (SEPC),” esplika Prezidenti Babo.
Primeiru Lideransa APC haktuir APC hamrik hanesan terseiru pilár iha sistema integradu ba siguransa nasionál, depois de F-FDTL ho PNTL tuir ninia objetivu mak atu proteje ema, rikusoin no ambientál.
Dirijente ne’e esklarese finansaeiru ne’ebé APC jere hodi responde ba asuntu dezastre nian, mai husi OJE no parseiru dezenvolvimentu sira.
Tanba ne’e Nia husu ba Red Cross Red Crescent Climate Centre, ho ajénsia dezenvolvimentu sira atu servisu hamutuk ho APC oinsa atu jere dezastre ne’ebé akontese iha territóriu nasionál no kria mekanizmu foun halo balansu ba komunidade sira iha siklu dezastre nian liuhusi prevensaun no mitigasaun.
Iha sorumutu ne’e, Prezidente Babo hatoo mós difikuldade balun APC hasoru, iha parte rekursu umanu no finanseiru nian.
Liga ho assuntu responde ba dezastre nian, Technical Advisor Red Cross Red Crescente Climate Centre, Agustinho dos Reis de Fátima hateten APC ho parseiru dezenvolvimentu sira karik bele kria draf kona-bá Rout Map atu nune’e bele tau hanoin hamutuk hodi haree kona-ba asaun responde ba dezastre no sai mós dokumentu ne’ebé bele hetan rekoñesimentu husi governu.
Foto & Textu: Nato Soares (GREC-APC)