𝐉𝐀𝐏𝐀𝐔𝐍 𝐊𝐎𝐍𝐓𝐈𝐍𝐔𝐀 𝐀𝐏𝐎𝐈𝐔 𝐒𝐄𝐏𝐂 𝐁𝐀 𝐑𝐄𝐙𝐈𝐋𝐄́𝐍𝐒𝐈𝐀 𝐑𝐄𝐃𝐔𝐒𝐀𝐔𝐍 𝐃𝐄𝐙𝐀𝐒𝐓𝐑𝐄 𝐈𝐇𝐀 𝐓𝐋

Dili, 05 fevereiru 2024- Sua Exelénsia Sekretáriu Estadu Protesaun Sivíl (SEPC), Domingos Mariano Reis atende enkontru no vizita ofisiál Embaixadór Japaun iha Timor –Leste, Tetsuya Kimura iha edifísiu Autoridade Protesaun Sivíl (APC), Kaikoli.

Reuniaun entre Embaixadór Japaun iha Timor –Leste ho SEPC ko’alia kona-ba koperasaun parte governu Japaun kontinua apoiu governu Timor-Leste liuhosi SEPS –APC ba rezilénsia redusaun risku dezastre iha Timor-Leste.

Ba jornalista sira, Embaixadór Japaun iha Timor –Leste, Tetsuya Kimura hateten vizita ida ne’e hanesan kontinuasaun ba koperasaun governu Japaun halo ona governu Timor-Leste iha tinan kotuk, ne’ebé apoiu orsamentu ho montante hamutuk 470 mil liu hosi IOM hodi provide naun food item ka la’os aihan ba vítima dezastre naturais iha sentru evekuasaun temporária nomós treinamentu.

Diplomata ne’e deklara governu Japaun iha komitmentu atu apoiu no fornese tan orsamentu ho montante hamutuk 480 mil liu hosi nafatin IOM atu kontinua nafatin programa sira hanesan hala’o iha tinan kotuk inklui mos kapasitasaun rekursu umanu ba APC.

“Iha projetu foun inklui atu apoiu APC formasaun ba funsionáriu sira, nomós atu haforsa komunidade ninia koñesimentu ba rezilénsia dezastre, apoiu solar panel, seguransa liuliu ba iha parte saúde nian,” haktuir Embaixadór Japaun.

Nia hatutan Japaun apoiu Timor-Leste viatura espesiál ba bombeirus sira hodi apoiu protesaun sivíl sira no koperasaun ida ne’e kontinua.

Iha biban ne’e Sekretáriu Estadu Protesaun Sivíl, Domingos Mariano Reis lori governu Timor-Leste apresia ho apoiu governu Japaun nian ba APC hodi responde ba dezastre no emerjénsia.

“Governu Jepaun la’os foin maka marka prezensa iha Timor – Leste, maibé pasadu kedas, hahú Timor- Leste ukun rasik an, governu Japaun hanesan parseiru internasionál Timor – Leste nian, ita apresia tebes, tanba tinan ida ba kotuk Japaun apoiu orsamentu 470 mil dolar amerikanu mai APC hodi apoiu ai-han no la’os ai-han hodi koresponde emerjénsia iha Timor-Leste,” haktuir SEPS.

Governante ne’e hatutan Japaun kontinua apoiu Autoriedade Protesaun Sivil liu liu ba rezidensia komunidade nian kapasita rekursu humanu hodi bele prepara responde no rekopera ba emerjénsia iha Timor–Leste.

Antes konklui, Memmbru Ezekutivu ne’e lori governu Timor-Leste hatoo sentidu kondolénsia klean governu Jepaun relasiona ho kauza dezastre afeta povu Jepaun lubuk ida mate, nolubuk mak lakon sira-nia rikusoin.

Entretantu, enkontru koperasaun akompaña hosi Prezidente APC, Suprintendente PNTL, Ismael da Costa Babo, Komandante Operasaun Nasional APC, Suprintendente Asistente PNTL, Nuno Romualdo Gomes no Diretto GREK, Cesario da Silva Marques.

Foto/Textu: Cipry (GREC-APC)