Dili, 05 fevereiru 2024-Autoridde Proteção Civil (APC) fó formasaun ba funsionáriu kontratadu ka kazuais foun hamutuk 111 hosi nasionàl, munisípiu no rejionál kona-ba funsionamentu APC, organograma APC, lei Baze Protesaun Sivíl, konseitu báziku dezastre no sistema leventamentu dadus dezastre nian.
Formasaun ofisialmente loke hosi S.E. Sekretáriu Estadu Protesaun Sivíl (SEPC), Domingos Mariano Reis, akompaña husi Prezidente Autoridade Protesaun Sivíl (APC), Superintendente Polisia Ismael da Costa Babo no Komandante Operasaun Nasionál APC, Superintendente Assistente Nuno Romualdo Gomes iha salaun APC, Kaikoli, durante loron rua hahú hosi 05 to’o 06 fevereiru 2024.
Iha abertura S.E. Sekretáriu Estadu Protesaun Sivíl (SEPC), Domingos Mariano Reis hateten funsionamentu iha instituisaun no organizasaun persija organograma no hatene superiór nomós irárkia sira.
“Servisu iha organizasaun presija iha organograma ou estrutura ne’e, tenke koñese ita-nia superiór irárkia sira no superiór irárkia mós tenke hatene nia subordináriu sira, para familiár iha servisu” esplika Sekretáriu Estadu.
SEPS argumenta “Ita koñese malu atu familiariza estabilidade iha servisu fatin no estabilidade iha organizasaun ou instituisaun ida, nune’e formando sira tenki iha seriedade hodi koñese di’ak organograma Protesaun Sivil nian no konseitu báziku dezastre nian, atu wainhira tun ba terrenu halo levantamentu dadus karik tenke koñese klaru ho didi’ak kona-ba kritéria sira.”
Atu termina, Governante ne’e husu ba funsionáriu sira hotu atu mantein dixiplina, mantein profisionalizmu no obedese ba ordem superiór irárkia.
Formasaun fasilita hosi Adjuntu Aero, Mariano Ana Lopes no esplika kona-ba ezisténsia Protesaun Sivíl hamrik ho Lei baze Protesaun Sivíl nú 12/2020/ 2 de Dezembro, defini husi Konstituisaun RDTL Art. 147 Polísia no Forsa seguransa sira; Lei Nú 2/2010/21 de Abril Lei sefuransa Nasionál; 12/2020/2 Dezembro Lei Protesaun Sivíl; Decretu Lei Nú 11/2022/ de 09 de Marsu aprova Estrutura Orgânika APC no Diploma Ministerial Nú 1/2023, 09 de Janeiru Estrutura Orgânika funsionál APC nian, inklui vizaun, misaun no prinsípiu sira APC nian.
Alende ne’e ko’alia mós kona-ba papel importante APC nian, salva vida, rikusoin no meio ambiente.
Enkuantu, Adjunto Terrestre Martinho Fátima fasilita sistema levantamentu dadus dezastre tuir kritéria ne’ebé difine ona iha formatu Protesaun Sivíl nian.
Partisipa iha enkontru ne’e, Diretór Bombeiros, Diretór GREC, Diretór DNGR, Diretór DNGRD, Diretór GPEA, GIAI, Adjunto AERO, Adjunto Terrestre no Adjunto Marítima. Formasaun ne’e realiza tamba servisu hamutuk entre Gabinete Planeamentu Estratéjiku e Assesoria (GPEA), Diresaun Nasionál Jestaun Risku Dezastre (DNGRD) ho apoio tomak Komandante Operasaun Nasionál nian no fasilita husi Adjunto Aero, Terrestre no Marítima.
F/T: Nato (GREC-APC)