Dili, 15 Fevereiru 2024-Ministru Interior, S.E. Francisco da Costa Guterres, Sekretáriu Estadu Protesaun Sivíl, S.E. Domingos Mariano Reis akompaña hosi Komandante Jerál PNTL, Komisáriu Henrique da Costa, Prezidente Autoridade Protesaun Sivíl, Superintendente PNTL, Ismael da Costa Babo simu vizita kortezia hosi Deputadu Komisaun B Parlamentu Nasionál (PN) iha Ministériu Interior (MI), Vila-Verde.
Ho vizita espesiál hosi Deputado Komisaun B, Parlamentu Nasionál ne’ebé trata asuntu Negósiu Estranjeiru, Defeza no Seguransa Nasionál, lidera husi Prezidente Komisaun B, Domingos Augusto “DEKER” hodi ko’alia kona-ba asuntu seguransa interna liga ba migrasaun, kontrolu fronteira, protesaun sivíl no koperasaun polisiál.
Prezidente Komisaun B Parlamentu Nasionál, Domingos Augusto “Deker”, esplika objetivu hosi vizita ida ne’e atu halo diskusaun relativamente ho situasaun seguransa rai laran, nune’e bele iha rekomendasaun ruma hodi implementa Planu Estratéjiku Seguransa Interna 2030 nian.
“Vizita kortezia ida ne’e bazeia ba ami-nia planu no hanesan komisaun, ne’ebe tau matan ba área Negósiu Estranjeiru, Defeza no Seguransa, ami iha obrigasaun atu aprosima hodi hato’o ami-nia lia menon ruma, nune’e ezekusaun ba planu no atividade sira, ne’ebé inklui iha OJE 2024 bele la’o ho di’ak no akompaña hodi halo fiskalizasaun iha futuru”, hateten Prezidente Komisaun B.
Entretantu, partisipa iha enkontru ne’e envolve mós Diretór Jerál, Diretór Nasionál, Xefe Gabinete, inklui Asesór sira iha Ministériu Interior (MI) no Sekretaria Estadu Protesaun Sivíl (SEPC).
Nato (GREC-APC)