Dili, 29 Abril 2024, Autoridade Protesaun Sivíl (APC), liu husi Porta Voz APC Nelson Nunes Orleans, atuál xefi seksaun protokolu Gabinete Relasaun Externa no Komunikasaun (GREC-APC), aprezenta rezultadu dezastre naturais durante semana ida, hahu husi loro 22-29 Abril 2024, iha territóriu nasional, CNOPC-APC rejista ema ida mate no xefi familia 27 mak hetan estragus, maioria husi anin sobu no be’e sae. Nelso Nunes Orleans hatoo lia hirak ne’e durante konferénsia inprensa iha sala konferénsia APC Kaikoli Dili.
Porta Voz APC, Nelson Nunes Orleans, ne’e hateten dezastre naturais ne’e, kobre Munisípiu hitu hanesan Munisípiu Baucau, Bobonaro, Covalima, Lautem, Manatuto, Manufahi no Munisípiu Viqueque. Atuál xefi seksaun protokolu GREC-APC ne’e hatutan, husi total estragus sira ne’e, maioria husi anin sobu no be sa’e.
“Hahu iha loron 22-29 Abril 2024, durante semana ida ne’e, iha rejiaun Timor-Leste normal no akontese tipu dezastre maka CNOPC-APC rejistu uma hamutuk Xefi famílias 27 mak hetan estragus no mate nain 1, liu-liu iha Munisipiu sira hanesan tuir mai ne’e: Munisípiu Baucau (Anin sobu uma 1), Munisípiu Bobonaro (Anin sobu uma 2), Munisípiu Covalima (Anin sobu uma 1), Munisípiu Lautem (Ahi han uma 1), Munisípiu Manatuto (Anin sobu uma 5), Munisípiu Manufahi (Be’e sae 14), Munisípiu Viqueque (Anin sobu uma 3, Mate 1)”.
Vítima afeitadu husi dezastre naturais refere, tuir Nelson Nunes Orleans katak, APC liu husi komando operasionál munisípiu sira servisu hamutuk ho parseiru umanitáriu sira fo ona asisténsia emerjénsia hanesan food no non food item.
“Husi dezastre sira ne’e, APC halo ona levantamentu dadus hodi hare ba tipo tolu hanesan at total, naton no at kma’an, ho ida ne’e mak sei hetan rekooperasaun ba uma ida-idak. Neste momentu APC mos halo kedan primeira sokorru hodi apoio emerjénsia ba família vítima sira food item no non food item, durante sira”.
Enkuantu familia balun ne’ebé seidauk hetan apoio, komandu APC munisípiu sira kontinua foti dadus atu bele apoio iha segundu faze nian tuir tipo dezastre ne’ebé la hanesan.
Xefi seksaun protokolu GREC-APC ne’e konfirma katak hahu husi Janeiru too iha fulan Abril, APC halo ona rekooperasaun ba uma hamutuk 309, liliu ba munisípiu hat mak hanesan Ainaru,
Manufahi, Lospalos nomos Ermera.
Entretantu ba vítima ne’ebé lakon vida ka mate, tuir dadus ne’e APC liu husi CNOP rejista katak vítima ne’e lakon vida tamba kauza husi Mota lori, iha Munisípiu Vikeke, Postu Vikeke Villa, Suku Bibileo, Aldeia Aisahe, iha loron 20/04/2024.
Autoridade Protesaun Sivíl hakarak rekomenda ba Komunidade hotu.
– Karik akontese Udan no Anin bo’ot ruma husu komunidade atu bele hases an fatin rizku sira hanesan mota ninin, Foho Lolon, ai-hun bo’ot, liña eletricidade, rai dokumentus importante iha fatin ne’ebeseguru.
-Kazu emergênsia ruma halo tuir orientasaun Autoridade Lokal ou pessoal Protesaun Sivil ne’ebé besik ou karik presiza halo evakuasaun, mantein kalma nafatin, buka fatin ne’ebe seguru no evita paniku.
Informasaun detallu bele asesu liuhusi pagina facebook DNMG Timor-Leste.
Ekipa Kobertura Media GREC-APC