Manufahi, 07 Maiu 2024-Autoridade Protesaun Sivíl (APC) Munisípiu Manufahi lideradu Komando APC hamutuk ho estrutura APC no servisu Munisipál jestaun dezastre Munisípiu Manufahi loron ohin apoiu emerjénsia hanesan aihan no laos aihan ba família vitima uma kain 74 ne’ebé mak afeitadu ba korente mota laklo iha segunda madrugada semana ne’e.
Iha prosesu apoiu emerjénsia ne’e Presidenti Autoridade Munisipál Manufahi Luis Marcal da Costa Tavares mak aluga kareta kamioneta ida hodi tula sasan emerjénsia sira husi Kuartél Bombeiros APC Luak ba Aldeia Colocau Suco Umaberloik Postu Administrativo Alas.
Komunidade afeitadu sira husi kolokau maioria hato’o sentimentu katak sira moe tamba kada tinan sempre hetan hela de’it apoiu emerjénsia tamba ne’e maka komunidade sira husu ba governu atu bele aselera lalais bronjong ne’ebé mak agora dadaun halo hela maibé sedauk finaliza nune’e ba oin sira hotu bele hela ho seguru husi ameasa mota refere.
Branco (Media APC Manufahi)