Likisa, 08 Maiu 2024 – Autoridade Protesaun Sivíl (APC), liuhusi Unidade Espesiál Protesaun Sivíl (UEPC), iha Kuarta ne’e halao atividade prátika Salvamentu Grande Anglu iha Aldeia Lebloa, Suku Ulmera Munisípiu Likisa.
Atividade refere hahu ho teoria iha Sentru Formasaun Kumoro, hafoin tuir ho ezersiziu fíziku lao ain husi rotunda Tibar to’o Aldeia Fahite, Suku Ulmera, iha loron 07 Maiu 2024 no taka ho prátika Salvamentu Grande Anglu iha terrenu.
Tuir instrutor UEPC, Luis de Araujo Atividade prátika salvamentu grande anglu ne’e, mak oinsa atu orienta membru sira halo salvamentu rápidu ba vítima sira ne’ebé hetan dezastre iha fatin naruk no oinsa hasai vítima husi fatin refere atu hetan tratamentu.
“Husi inisiu mai too ohin loron ne’ebé mak iha prátika hanesan ohin itabot sira hare, katak téknika ida mais importante oinsa no halo nusa sira halo evakuasaun ba vítima ne’ebé mak hetan ajar iha rainaruk, oinsa sira bele foti sai vítima ne’e hodi lori ba rekoopera hodi halo tratamentu ida ne’ebé mak mais seguru liu”.
Instruktor ne’e esplika liutan katan iha montajen liñas rapel sira ba prátika Salvamentu Grande Anglu ne’e iha modelu rua mak liña rapel Australianu no Amerikanu.
“Liña rapel ne’ebé mak ho espesialidade Amerikanu ho Australianu, prontu, sira Unidade Espesiál tenki aplika kona-bá téknika rua ne’e hotu. Tamba sira presija esperiensia iha situasaun ne’ebé mak emerjénsia, sira uza Australiano par lalais hodi tun ba salva ne’ebé mak iha perigu nia laran hodi halo evakuasaun, seguinte rapel Amerikanu ne’ebé mak sira tenki trenu kedas ona katak wainhira iha vítima ruma ne’ebé mak labele la’o iha fatin as, sira bele hakuak ka kous hamutuk hodi hasai husi fatin refere”.
Tuir Luis de Araujo, xave importante ba Unidade Espesiál mak tenki apriende no apriende nafatin tamba atu salva ema nia vida ne’e iha momentu no situasaun ne’ebé la hanesan no sei iha mudansas liutan iha futuru, nune’e hanesan Unidade Espesiál tenki bem-preparado liuhusi treinamentu sira.
Filomena Lay Freitas, membru Unidade Espesiál ne’ebé hola parte mos iha prátika salvamentu grande anglu ne’e agradese ba oportunidade diak iha formasaun no prátika salvamentu grande anglu ne’e tamba iha vantajen bot liliu atu salva vítima sira wainhira hetan dezastrenia hatutan maske iha vantajen bot maibe iha mos difikuldade tamba iha prátika Salvamentu Grande Anglu ne’e lori mos risku ba sira nia vida.
Comadante UEPC, Fernando da Costa iha nia intervensaun hateten Unidade Espesiál Protesaun Sivíl decide Lebloa nudar fatin treinamentu nia tamba hakarak atu hatomak membru sira nia mentalidade ho rainaruk sira.
“Objetivu ida ami hili mai iha fatin ne’e, tamba atu hatomak sira iha rai naruk sira, ita hatene katak ita nia rai ne’e rainaruk barak, liliu iha parte Ermera, Manufahi, ita halai ba iha parte Maliana nian, iha Subaun ka iha Jakarta 2 Ainaru nian, rai naruk deit”.
Nia hatutan tan katak membru sira tenki hatoman an horainaruk tamba ita nia komunidade sira dalaruma hetan dezastre iha fatin sira ne’e no dalan laiha, sira tenki uza tátika sira par oinsa tun ba evakua vítima sira no formasaun ne’e sei kontinua nafatin iha períodu tuir mai.
Atividade prátika Salvamentu Grande Anglu, halao durante loron tomak, no iha lorokraik ensera kedas husi Komandante Unidade Espesiál Protesaun Sivíl. Instruktor ba iha atividade ne’e, husi DNB, xefi Brigada Bombeiros Munisípiu Likisa inklui superiores husi UEPC ne’e rasik. Enkuantu membrus UEPC ne’ebé partisipa prátika Salvamentu Grande Anglu ne’e hamutuk nain 37 husi nasionál.
#Textu Natu Soares/ Foto Basilio Masques#