Laútem, 28 maiu 2024- Ekipa Sekretária Estadu Protesaun Sivíl ho Autoridade Protesaun Sivíl (SEPC-APC) halo vizita traballu ho ajénsia sira hosi konsórsiu Australian Humanitarian partnership (AHP) hanesan Care, Oxfam, World Vision, Plan International, Caritas) ho ONG nasionál no ONG lokál hodi monitoriza no observa sistema konservasaun no protesaun bee matan, ne’ebé konstrui hosi Grupu Unidade iha Suabat, aldeia Etewata, suku Tirilolo, postu administrativu Ilomar, munisípiu Laútem.
Projetu harii tanke bee moos ho medida 4×4 duransaun fulan 5, hahú hosi novembru 2023 to’o maiu 2024, ne’ebé mai hosi servisu voluntáriu hosi membru 20 Grupu Unidade iha aldeia Etewata ho apoiu hosi Child Fund no Fraterna liu hosi Plan Internasional-AHP ho fundu hosi Austrália.
Bee matan ne’e sei utiliza ba atividade agrikultura nian hanesan kuda modo, haki’ak ikan, animál no utiliza ba nesidade prioriedade nian mak konsumu tein, hemu, fase ba uma kain hamutuk 50 iha aldeia refere.
Entretantu, implementasaun projetu konserva bee matan iha aldeia Etewata parte ida hosi projetu Disaster Ready ka prontu ba dezastre hodi haforsa rezeliénsia komunidade sira-nian hasoru dezastre iha tempu bailoron naruk.
Partisipa iha monitorizasaun ba projetu ne’e kompostu Xefe Gabinente SEPC, Adelino da Costa Soares, Diretór GREK, Cesario da Silva Marques, Kordenadór Nasionál Projetu Disaster Ready, Maqsood Kabir, Komandante APC munisípiu Lautem, Reprezentante DFA, Reprezentante Administradór postu Ilomar, Xefe Suku Tirilolo no Xefe Aldeia sira.
Cipry GREC-APC