Lautém, 24 Jullu 2024 – Komandu Operasional Autoridade Protesaun Sivíl (APC) Munisípiu Lautém, ohin liuhusi Segundu Komandante ‘Corpo Bombeiros’ (CB) Victor da Costa Juni, ne’ebé akompaña mós husi Komandante CB Brigada-III; Teofilio C. Almeida, hamutuk ho parseiru Organizasaun Naun-Guvermentais (ONG’s) Fraterna, hala’o atividade treinamentu primeiru sokorru nian.
Treinamentu ne’e ohin hala’o iha sede Suku Tirilolo, ne’ebé prinsipál liu ba Autoridade Lokal no Konsellu Suku tomak husi Suku Tirilolo, Postu Administrativu Iliomar.
Objetivu husi treinamentu ne’e rasik katak atu eleva kunesimentu nu’udar Autoridade Lokal Suku nian ne’ebe besik liu nia komunidade, oinsa bele halo intervensaun lalais hodi bele salva vida nia komunidade rasik iha dezastre no mos akontesimentu ruma, molok vitima hetan asistensia ou tratamentu husi sentru Saúde.
Treinamentu ne’e hetan partisipasaun maximu husi membru Konsellu Suku Tirilolo to’o remata.
Edy Média APC Lautém.