Dili, 05 Agustu 2024-Funsionáriu no estrutura orgánika Autoridade Protesaun Sivíl (APC) ho Sua Exelénsia Sekretáriu Estadu Protesaun Sivíl, Domingos Mariano Reis partisipa iha serimónia Isar Bandeira, primeira semana, fulan Agusto, tinan 2024, ne’ebé prezide hosi Sua Exelénsia Ministru Interior, Francisco da Costa Guterres, Ph.D. iha resintu Ministériu Interior, Vila-Verde.
Inspetór serimónia Isar Bandeira, Sua Exelénsia Ministru Interior, Francisco da Costa Guterres, Ph.D. hateten fulan Agusto hanesan importante ba komemorasaun loron istóriku 2; primeiru komemora loron Falintil 20 Agustu no segundu komemora loron konsulta populár iha 30 Agustu nu’udar valór determinasaun.
“Ho komemorasaun loron importante 2 fó valór determinasaun, ita tenke kaer no tane as valór hodi bele hala’o iha ita-nia servisu lorloron nian, para bele kontribui dezenvolvimentu nasaun nian ba, oin,” deklara S.E. Ministru Interior.
Governante subliña “Valór ida ha’u temi determinasaun katak ba oin tenke halo buat ruma, aprende, atu hatutan, ita tenke hanoin halo buat ruma.”
Ministru fundamenta Estadu eskolla no fó fár funsionáriu sira atu dezempeña papel ida, atu halo servisu to’o ninia rohan, halo to’o hotu, no halo ho di’ak hodi benefísia povu no Estadu ida ne’e.
Membru Ezekutivu ne’e, husu ba funsionáriu MI ho APC foin lalais hetan fiar kaer kargu atu dezempeña papel ho di’ak, ida ne’e responsabilidade, la’os oportunidade.
#Cipriano (GREC-APC)