Ermera, 13 Agustu 2024-Komandante APC Munisípiu Ermera Norberto Soares Exposto, akompaña husi Komandante Bombeiros Januario José de Deus no Xefe Gabinete Munisipál Jestaun Risku Dezastre Filomena Soares partisipa iha Workshop Realiñamentu Planu Estratéjiku Seguransa Interna ho tema “HADIA, HAMETIN NO HABELAR SERVISU HODI ALKANSA VIZAUN SEGURANSA INTERNA, 2025-2040”, ne’ebé hala’o iha Salaun Autoridade Munisípiu Ermera.
Workshop Realiñamentu Planu Estratéjiku Seguransa Interna abertura husi Sua Exelénsia Ministru Interior Francisco da Costa Guterres, PhD. hateten katak tuir polítika IX governu Konstitusional sei hatu’ur lolos prioridade importante sira durante mandatu.
“Programa IX governu konstitusional nian hare’e ba área seguransa interna, hakarak halo revizaun no kontinua implementa planu estratéjiku seguransa interna nian, ho objetivu estratéjiku Ministériu Interior, iha longa prazu tuir mehi estadu nian, hodi tun diréta ba baze, atu konsulta no rekolla informasaun ne’ebé sufisente ba komplementa prosesu realiñamentu planu estratéjiku seguransa interna 2025-2040 nian laran, ne’ebé sai preioridade” dehan Ministru Interior, Francisco da Costa Guterres.
Workshop ne’e partisipa husi Autoridade Munisipál,Diretores Servisu Munisipais, Delegasaun servisu teritorial, PNTL, Autoridade Lokal no funsionáriu públiku sira.
Basty Média APC Ermera.