Liquiça, 20 Agustu 2024-Prezidenti Autoridade Protesaun Sivíl (APC), Exelénsia Jesuino dos Reis Matos Carvalho, akompaña husi Komandante Operasaun Nasionál APC, Sup. Assistente Polisia Nuno Romualdo Gomes hamutuk ho kargu xefia husi APC nasionál kontinua halo vizita ofisiál ba Komandu APC Munisípiu likisa hodi rona preokupasaun no dezafius durante hala’o servisu operasaun iha terrenu.
Perante funsionariu tomak, Prezidente APC hateten, vizita ofisiál mai iha Munisípiu Likisa ne’e, hakarak atu rona preokupasaun no dezafiu ne’ebé APC Liquiça hasoru durante ne’e.
“Hau mai iha vizita ida ne’e, hahu kedas iha hau nia mandatu nudar prezidenti foun ba APC, hau trasa kedas ona hau nia plano ida, seidauk to’o fulan ida maibé hau hakarak halo hau nia vizita ba estrutura iha munisipiu tomak. Delegasaun ida ne’e, ami halo mos vizita ba Suai, Ainaro, Aileu, Ermera nomos ohin iha Likisa,” haktuir Prezidenti APC .
Exelénsia Jesuino dos Reis Matos Carvalho hatutan, katak vizita ida ne’e loke ona no hahu servisu hamutuk, hodi hahu halo buat ne’ebé maka uluk ladun diak atu halo di’ak liutan.
Lideransa APC ne’e klarifika katak servisu hamutuk ne’ebé presija tebes atu hare hamutuk mak assegura tuir prinsípiu Proteze no Servi hodi fo vida atu salva vida.
“Hau hakarak loke fuan no laran ba servisu hamutuk ida ne’e atu ita asegura servisu iha APC ida ne’e i asegura prinsípiu ida ne’e atu servi atu proteje no fo vida hodi salva vida ba ita nia populasaun espesialmente iha rai Likisa ida ne’e,” deklara Prezidenti APC.
Superior APC ne’e sibliña, estrutura ida ne’e, estrutura foun, ne’ebé mak halo mudansa bot tebes, maibe ida ne’e desijaun políitiku sira nian.
Nia fortifika liutan katak servisu sira uluk husi estrutura APC Anterior sira halo ona buka atu asegura no halo ba oin, basa estrutura mak foun maibé situasaun no servisu sira kontinua lao tuir ninia programa no regras.
Iha okaziaun ne’e, Prezidenti APC reafirma tan katak vizita ofisiál ne’e, atu mai rona duni preokupasaoens sira, saida mak durante ne’e APC hasoru.
Bazeia ba assuntu ne’e, mak Prezidenti APC esklarese ekipa ou estrutura sira husi nasionál atu bele hare hamutuk oinsa atu rezolve dezafiu sira ne’ebé durante ne’e APC hasoru hodi hadia diak liutan.
Depois halo tiha vizita ofisiál iha Munisípiu Liquiça, Prezidenti APC ho ekipa sei kontinua kedas ba Munisípiu Bobonaro hodi rona mos preokupasoens sira husi servisu APC Munisípiu Bobonaro nian.
Vizita ofisiál Prezidenti APC iha Munisípiu Likisa, akompaña husi, Komandante Operasaun Nasionál APC, Inspetora GIAI, Diretór DNRGD, Diretor CB, Xefi Unidade Marítima, Komandante UEPS, Xefi seksaun protokolu-GREC inklui delegasaun husi gabinete Sekretariu Estadu Protesaun Sivíl.
# Nato Soares# GREC-APC