Malázia, 28-29 Agostu 2024, Prezidente Autoridade Protesaun Sivíl, Jesuíno dos Reis de Matos Carvalho, akompaña husi Xefe Seksaun Komunikasaun Gabinete Relasaun Esterna no Komunikasaun, Agostinho Cosme Belo no Liaison Officer for ASEAN-MNEC, Aurio Francisco da Costa partisipa “The Eight Meeting of the ASEAN Committee for Disaster Management Working Group on Preparedness, Response and Recovery (ACDM WG PRR) & The Nineteenth Meeting of the ASEAN Technical Working Group on Civil-Military Coordination, 28-29 August 2024, Kota Kinablu, Sabah, Malaysia”.
Sorumutu abertura ba ACDM WG PRR iha Co-Chair nain 3 mak hanesan: Mr. Zamakhshari Bin Hanipah, Deputy Director General (Policy), National Disaster Management Agency (NADMA) Malaysia; DR. Min Thein, Deputy Director General Department of Disaster Management (DDM), Ministry of Social Welfare, Relief and Resettlement, Republic of the Union of Myanmar; no Mr. Abdul Razak Bim Abdul Raheem, Director Planning and Organization Singapore Civil Defence Force (SCDF), Republic of Singapore hato’o uluk bemvindu ba Prezidente Autoridade Protesaun Sivíl foun, Jesuíno dos Reis de Matos Carvalho ne’ebé partisipa iha sorumutu refere.
Co-Chair sira mos esplika katak objetivu husi reuniuan ne’e mak atu avalia no halo revizaun ba progresu no dezáfiu implementasaun atividade sira iha ámbitu Programa Prioridade 3 “Preparasaun no Resposta” no Programa Prioridade 4 “Reziliénsia no Rekuperasaun” husi Akordu ASEAN kona-ba Jestaun Dezastre no Resposta Emerjénsia (ASEAN Agreement on Disaster Management and Emergency Response/AADMER) 2021-2025.
Prezidente Autoridade Protesaun Sivíl mós hetan oportunidade husi Co-Chairs hodi halo intervensaun dala rua iha Sorumutu Grupu Traballu ACDM nian kona-ba Preparasaun, Resposta no Rekuperasaun no Sorumutuk Grupu Traballu Tékniku ASEAN nian kona-ba Kordenasaun Sivíl-Militária.
Iha intervensaun, Prezidente APC hato’o agradese wa’in no apresiasaun bo’ot ba Ajénsia Nasionál Jestaun Dezastre (NADMA) Malázia, Sekretariadu ASEAN no AHA Centre ne’ebé konvida ona Timor-leste hodi partisipa iha sorumutu importante refere. Prezidente APC mós hato’o apresiasaun ba Governu Malázia nuudar uma nain ba reuniaun ne’e.
Hosi sorin seluk, Prezidente APC realsa katak sorumutu ne’e importante tebes atu eleva kapasidade ba preparasaun, resposta no rekuperasaun hanesan Autoridade Protesau Sivíl ne’ebé foin establese no hein oportunidade sira-ne’e bele prepara Timor-Leste nian adezaun ba ASEAN.
Sorumutu ba loron 2 hala’o iha ótel Le Méridien, Kota Kinabalu, Sabah, Malázia ne’ebé partisipante sira husi nasaun Malázia, Singapura, Mianmar, Indonézia, Laos PDR, Tailandia, Filipina, Kambódia, Vietnam, Brunei Darussalam no Timor-Leste nuudar observadór.